Mekteb-i Sevdâda Ancak Ders-i Ma'nâdır Garaz
14 Kasım 2022 tarihinde yayınlanmıştır.
NUTK-İ ŞERÎF
1
Mekteb-i sevdâda ancak ders-i ma'nâdır garaz
Ders-i ma'nâdan mücerred 'aşk u zîbâdır garaz
Belde-i dâreynde mahzâ bu sevdâdan garaz
Bâde-i meyhâneden keyf-i tevellâdır garaz
Câm-ı cemden meh-nümâ kalb-i mücellâdır
Özge yok dîvânelikden ân-ı Leylâ'dır garaz
Seyr-i dilden vasl-ı dildâr-ı dil-ârâdır garaz
"Rabbi erinî erinî"den dîdâr-ı bî-tâdır garaz
Gayr-ı hüsn-i 'aşkdan 'âlemde bî-câdır garaz
Lafz-ı "levlâ"dan ki ey dil gör ne ma'nâdır garaz
Hilkat-i 'âlemden ancak hubb-i Mevlâ'dır garaz
Ülfet-i Âl-i Abâ Evlâd-ı Zehrâ'dır garaz
2
Meşreb-i rindân ü sahbâ-yı mehabbet hakkıyçün
Meslekü'l-'uşşâk ü erbâb-ı tarîkat hakkıyçün
'Âşık u ma'şûk müştâk-ı hakîkat hakkıyçün
Ferd ü bî-tâ mûnis-i tenhâ vü vahdet hakkıyçün
Kelime-i Tevhîd ü güftâr-ı şehâdet hakkıyçün
'İzzet-i çâr-kütüb i'câz-ı âyet hakkıyçün
Çâr ashâb-ı Muhammed âl-i rahmet hakkıyçün
"Rahmeten-lil-'âlemîn" şems-i risâlet hakkıyçün
Feyz-i irşâd-ı bahâ nûr-ı velâyet hakkıyçün
Millet-i İslâm ü dîn-i ehl-i sünnet hakkıyçün
Hilkat-i 'âlemden ancak hubb-i Mevlâ'dır garaz
Ülfet-i Âl-i Abâ Evlâd-ı Zehrâ'dır garaz
3
Ben dimezdim sırr-ı pinhânımı feryâdım didi
Vâlih-i dildâr-ı Şîrîn gönül Ferhâdım didi
'Aşk-ı cân-perver sözün rûh-ı ferah-zâdım didi
Sohbet-i hûbları hurrem hâtırım şâdım didi
'Âşıkâne sözleri tab'-ı Hudâ-dâdım didi
Bu söz indim değildir 'aşk üstâdım didi
Heme mîr-i kârbânım hoş sadâ hâdım didi
Zümre-i 'uşşâk u şâh u muhlis ü hâdım didi
Kûy-ı Leylâ'ya enîsim rehberim hâdîm didi
Server-i mülk-i melâhat kutbü'l-irşâdım didi
Hilkat-i 'âlemden ancak hubb-i Mevlâ'dır garaz
Ülfet-i Âl-i Abâ Evlâd-ı Zehrâ'dır garaz
4
Çeşm-i Leylâ bilmedim âyâ ne teshîr eyledi
Nîm-nigehle bin dili der-bend-i zencîr eyledi
Saldı şûriş 'âleme nîr tek teşvîr eyledi
Âh u nâlim gâlibâ ol mâha te'sîr eyledi
Bî-dilân içre ki ol meyle beni pür eyledi
Bu dil-i dîvâneyi gör kim ne tedbîr eyledi
'Aşk u zîbâ sohbetin şi'râne tahrîr eyledi
Mushaf-ı ma'nâyı manzûmâne tefsîr eyledi
Bu şirîn güftârı nakş-ı kilk takdîr eyledi
Hem hakîkat hâcegânı böyle takrîr eyledi
Hilkat-i 'âlemden ancak hubb-i Mevlâ'dır garaz
Ülfet-i Âl-i Abâ Evlâd-ı Zehrâ'dır garaz
5
Bir şeb-i deycûr pîre bî-delîl âşüfte şûr
Vâdî-i sevdânı tayy itdim göründü Kûh-ı Tûr
Hâhiş itdim bir kabes ger kıldılar bahşiş-i nûr
Sundular bî-câm sahbâ nûş itdim bî-fütûr
Bir beşâşet virdi el kim eylemez dilden 'ubûr
Hâtırı hürrem mezâk itdim derûnu pür sürûr
Tâ 'arûs-ı vasl yüz açdı çalındı tabl-ı sûr
Vehbiyâne buldum ey Seyyid Nigârî bir sürûr
Bahşîşâne bâtınımdan itdi bu ma'nâ zuhûr
'Âlem-i ma'nâda hem gördüm okur gılmân u hûr
Hilkat-i 'âlemden ancak hubb-i Mevlâ'dır garaz
Ülfet-i Âl-i Abâ Evlâd-ı Zehrâ'dır garaz
Seyyid Hamza Nigârî
Kaddesallahu Sırrahu'l-Âlî