Melâz-ı Ehl-i Safâ Oldu Hânkâh-ı Ferâğ
17 Ağustos 2021 tarihinde yayınlanmıştır.
NUTK-İ ŞERÎF
Melâz-ı ehl-i safâ oldu hankâh-ı ferâğ
Ricâl-i merkezîdir kûşe-i penâh-ı ferâğ
Zimâm-ı himmet-i erbâb-ı 'aşka râm oldu
Ne denlü tûl u dırâz olsa şâh-rah-ı ferâğ
Kalır mı sâlik-i Hakk tengnâ-i mihnetde
Cemâl gösterir elbet sipihre mâh-ı ferâğ
Hulâsâ etmiş ezel tûtiyâ-yı hikmetden
Cilâ-yı bâsıradır hâk-i cilvegâh-i ferâğ
Humâr-ı nîm-şeb-i câm-ı hâb-ı gafletden
Uyandırır seher-i âb-ı intibâh-ı ferâğ
Makâm-ı hazret-i sultân-ı 'aşkdır cânâ
Harem-serây-ı muhabbetde tahtgâh-ı ferâğ
Rızâ'nın ahd-i ezelde başında devlet var
Zehî 'atâ-yı ilâhî zehî külâh-ı ferâğ
Neccârzâde Rızâ Efendi
Kuddise Sırruh