MuzafferOzak.com (Türkçe)

NUTK-İ ŞERÎF

Melek iken hatâ etdim anınçün olmuşam merdûd

Bu la'net ismini çekdim anınçün olmuşam merdûd

Ne olmuş ne olacağı bilirdim cümle 'ilm ile

Ne fayda kılmadım 'amel anınçün olmuşam merdûd

Tekebbürlük enâniyyet ikisi vâr idi bende

Sücûd etmeğe 'âr etdim anınçün olmuşam merdûd

Melâik hep sücûd etdi anınçün oldular makbûl

Ve hürmetden cüdâ düşdüm anınçün olmuşam merdûd

'İnâdımdan bulup durun ebed dinmez gözümden yaş

Hayâsızlık edüp durun anınçün olmuşam merdûd

İşim nâle vü âh etmek cehennemde ebed kaldım

Hakk'ın emrini terk etdim anınçün olmuşam merdûd

Ezelki hürmetim fazlım bana bildirmedi cehlim

Bu inkârın belâsından anınçün olmuşam merdûd

Benim benlikdeki fi'lim cemî' dillerde destândır

Bana hergiz 'ilâc yokdur anınçün olmuşam merdûd

Bu kahrın lutfu hiç yokdur gadabının kemâlidir

Dilim varmaz eydem tevhîd anınçün olmuşam merdûd

Bu sözden hiç garazım yok Hakk'a ma'lûm durur fi'lim

Hidâyet yok bana hergiz anınçün olmuşam merdûd

Günâhımdan birisini işit sana diyem bir kez

'İlmimde yoğ idi hilmim anınçün olmuşam merdûd

Bu da'vâsında fasl olmaz eğer bilmez isen nefsin

Cibillî hâletim fehm et anınçün olmuşam merdûd

Cezâ içün bana Allah sana sırrımı keşf etdi

Müsemmâ oldum ismime anınçün olmuşam merdûd

Yeter söyletdin ey mü'min ferâgat eyle sen benden

Dökülmüşdür yüzüm suyu anınçün olmuşam merdûd

Mükerremsin beni bildin sana hiç gizli yok durur

Vehâb Âdem'e 'âsîyem anınçün olmuşam merdûd

Abdülvehhâb Ümmî

Kaddesallahu Sırrahu'l-Âlî

Melek İken Hatâ Etdim Anınçün Olmuşam Merdûd