Merhabâ Ey Zât-i Pâkin Pertevi Nûr-ı Hudâ
24 Ekim 2022 tarihinde yayınlanmıştır.
NA'T-I ŞERÎF
Merhabâ ey zât-i pâkin pertevi nûr-ı Hudâ
Tâk-ı ebrun âsumânın eylemiş kaddin dü tâ
Şehper-i Cibrîl rikâbdârın Şeb-i Mi'râc'da
Pâdişah-ı rub'-i meskûndur kapunda bir gedâ
Pes dehânın sırrına vâkıf olan sâhib-dilân
Râh-ı 'âşkında vücûdun çün hayâl fenâ
Tan mı eylerse ziyâret hânesin kuddûsiyân
Kangı diller kim hayâlin ile oldu pür-zıyâ
İşbu zerrât-ı cihân ana 'ayân olsa ne var
Hâk-i pâyin dîdesine eyleyen kühl-i cilâ
Birisi gündüz birisi gecelik bu mihr ü meh
Esfer-i türben-dürür ey ifithâr-ı enbiyâ
Mürde diller pes kudûmünle hayâta irdiler
Rûh oldun bu vücûd-i âleme ey cân-fezâ
Mazhar-i feyz-i ilâhî kimse olmaz dünyede
Ey şeh-i 'âlem sana tâ itmeyince iktidâ
Fehm ü 'akl ile ne mümkin kadr ü şânın anlamak
Çünm seni Hakk eylemişdir külli nâsa pîşüvâ
Zât-ı pâkin ehl-i 'ısyâna olupdur bir berât
Çün senin zâtınla buldu derdine ceddin devâ
Tayy-ı vasfın nice etsin esb-i tab'-ı âdemî
Kim senin medhin iden Nâmûs-i Ekber hem Hudâ
Gel bu nefsim ejdehâsından beni eyle halâs
Ben garîbin eyleme dest-i 'adûya mübtelâ
Ey şefî'al-müznibîn ben 'âsîye kıl bir nazar
Destgîr ol bir nigâh-ı lutfunu eyle 'atâ
Ey hatâ-pûş-i atâ-bahşende ey kân-ı kerem
Bu Sezâyî-i rû-siyeh eyler cenâbından recâ
'Afv-ı cürm içün şefâ'at-hâh olup yevmü'n-nüşûr
Bu ümmîd ile der-i sultâna eyler ilticâ
Hasan Sezâyî
Kuddise Sırruh