Meyhâre-i Meyhâne-i Mestân-ı Hudâ'yız
15 Şubat 2021 tarihinde yayınlanmıştır.
NUTK-İ ŞERÎF
Meyhâre-i meyhâne-i mestân-ı Hudâ'yız
Mestâne-i peymâne-i merdân-ı Hudâ'yız
Sen sanma bizi zâhid ü yâ şeyh-i mukallid
Rindân-ı harâbât ü nedîmân-ı velâyız
Biz demeziz 'irfân ile bir kimseyiz âhar
Fî nefsi'l-emr cümle Hudâ biz heme "lâ"yız
'Ârif olagör anla sözüm kesb-i kemâl et
İstersen eğer göstere her şeyde Hudâ yüz
Firkatde vü vuslatda değil rûhumuz anla
U'cûbe seyirdir ki visâl içre cüdâyız
Mahv eylemişiz özümüzü sözümüzü hep
Pes mahvı koyup sahva gelüp ehl-i bekâyız
Ger yüz de olursak yüzümüz bir yüze sâcid
Yüz yerde gezer 'aşk ile birkaç fukarâyız
Sûretde fenâ şekli ile ehl-i 'abâyız
Ma'nâda gınâlar verici mün'im ü bayız
Bir cur'a meye bezl ederiz vârımızı hep
İşretkedeyiz bâde-horuz ehl-i safâyız
Pervâz edemez mürg-i hıred mertebemizde
Biz evc-i hakâyıkda uçar turfe hümâyız
Menzilgehimiz mertebe-i vahdet ü kesret
Hem anda vü hem bunda görünür budalâyız
Geh 'âbid ü geh zâhid ü geh nâsıh-ı sır-gû
Geh sôfî vü geh sâfî vü geh bî-ser ü pâyız
Geh mest ü geh ayık ü gehî 'âlim-i fâyık
Geh hayret ile bir şeyi bilmez cühelâyız
Benlikden ü senlikden edüp özümüzü pâk
El-minnetü lillah ki bu dem bî-men ü mâyız
Her kim ki Rusûhî gibi 'aşk ile fenâdır
Hâk-i rehine cân ile bâş ile fedâyız
İsmâil Ankaravî
Kaddesallahu Sırrahu'l-Âlî