Mihmândâr-ı Resûlullah
15 Temmuz 2019 tarihinde yayınlanmıştır.
MESNEVÎ
Seyyidi's-sâdat fahr-i enbiyâ
İki cihân pâdişâhı Mustafâ
Mekke'de doğdu sa'âdetle o mâh
Elli üç sâl anda tutdu câygâh
Sonra me'mûr oldu hicrete
Tâ Medîne halkı ere devlete
Ehl-i Yesrib çıkdı istikbâline
Müntazırlar koşdu isti'câline
Her biri etdi tazarru'la niyâz
Deyüp ey bîçâregâna çâresâz
Bendeliğe bizleri edüp kabûl
Hâneme ey şâh-ı dîn eyle nüzûl
Merhamet kânı 'inâyet menba'ı
'Âşık-ı üftadegânın eşfa'ı
Sonra hikmetle buyurdu ol Resûl
Hangi câya nâkam eylerse nüzûl
Ben dahi ol hânenin mihmânıyım
O güzel evcin meh-i tâbânıyım
Nâkadârı çün ki Cibrîl-i Emîn
Çekdi beyt-i Hâlid'e kıldı mekîn
Hâlid ibni Zeyd Ensârî budur
Hem Resûlullah mihmândârı budur
Bu şerefle buldu gâyet imtiyâz
Cümle ashâb oldu gıbta-sâz
Kâbil-i ta'rîf olmaz devleti
Mihmândârlıkdır anın 'izzeti
'Âşık-ı vech-i cemalûllah idi
Nâre yanmış bir dil-i âgâh idi
Geldi Rûm'a çü feth-i Kostantin için
Hem şehâdet buldu ol devlet-nümûn
Hâkipâyi verdi bu şehre şeref
Dürr-i zâtına olup kabri sadef
Rûh-i pâkine kılıp takdis-i tâm
'Âdile lutf ile olsun şâdkâm
Âdile Sultân
Rahmetullahi Aleyhâ