Müflisiz İki Cihanda Aşka Verdik Vârımız
14 Kasım 2021 tarihinde yayınlanmıştır.
NUTK-İ ŞERÎF
Müflisiz iki cihânda 'aşka verdik vârımız
Pîşemizdir Dost sevmek koduk özge kârımız
Nideriz biz dü cihânı çünkü bulmuşuz anı
Andan artuk cân u dilde yok-dürür tekrârımız
Bu safânın sâfisin içdik safâdır kalbimiz
Mâsivâdan aynamızda zerre yokdur bârımız
Biz ten ü cânı anın yolunda îsâr etmişiz
Akl ü fehm ü 'ilm ü zühdden kalmadı deyyârımız
Münkir olma sen bu 'aşka sıdk ile gel bul safâ
Kargadır münkir anın tatmaz bizim sükkârımız
Siz bizim bizden bize gitdiğimiz kılman 'aceb
Bir nefesde iki 'ıyd eder bizim tüccârımız
Zâhidâ var ki bu 'aşkdan duyarın yok senin
Bilmedi bilmeyiser bî-derd bizim esrârımız
Kimyâ-yı 'aşkı bulduk misi altun ederiz
Ortadan çıksın zagal kim safdır bâzârımız
Biz fenâ olup fenâdan key fenâya yetmişiz
Şöyle kim navh olmuşuz hiç kalmadı âsârımız
'Aşk ile olduksa fânî Dost ile bulduk bekâ
Çün bekâ-yı asl oldu bâkîdir envârımız
Levnimiz bî-levn ü renkdir niteliksiz nûrumuz
Rûhumuzda dâim esrik yok-dürür huşyârımız
Sen bu Eşrefoğlu Rûmî'nin sözün tanlama kim
Dahi bundan özgedir 'âşıklara ihbârımız
Eşrefoğlu Rûmî
Kuddise Sırruh