Muhabbet Bezmine Dil Ver Perîşân Olmak İstersen

6 Nisan 2019 tarihinde yayınlanmıştır.

NUTK-İ ŞERÎF

Muhabbet bezmine dil ver perîşân olmak istersen

Serâpâ âteş-i 'aşk ile nîrân olmak istersen

Gedâ-âsâ reh-i bâb-ı rızâ-yı Hakk'ı devrân et

Eğer ki nâil-i kurbetle sultân olmak istersen

Gerek âyîne-i sûret gerekse nakş-ı elvâna

Kapılma câna bak 'irfân-ı cânân olmak istersen

Bu 'âlem kilk-i kudretle yazılmış bir kitâb-ı Hakk

Hakâret etme bir mûra Süleymân olmak istersen

Tefekkür et hayâl-i hâli bu gülzâr-ı vahdetde

Nesîm-i feyz ile mestân ü hayrân olmak istersen

Hedef kıl sîne-i gamgîni gamz-ı çeşm-i âhûya

Şuhûd-i lâ-misâl-i veche kurbân olmak istersen

Tehalluk eyle evsâf-ı Celîl-i Hakk ile dâim

Eğer sûret ile sîretde insân olmak istersen

Fedâ et bir dili bir dilbere birlik diyârında

Eğer 'âlemlere bîgâne hicrân olmak istersen

Süvâr et zevrâk-ı cânı reh-i seylâbe-i 'aşka

Hitâm-ı rehgüzârın bahr-i 'ummân olmak istersen

Dü 'âlemden musaffâ ol soyun reng-i 'alâikden

Eğer vuslat-sarây-ı Hakk'a şâyân olmak istersen

Tehammül eyle hâr-ı mihnete zâr eyleyüp her şeb

Harîm-i dilde âgâh-ı gülistân olmak istersen

Dilinde mâsivâdan kalmasın zerre eser Sâmî

Hakk ile Hakk olup vahdetde mihmân olmak istersen

 Şeyh Abdurrahmân Sâmî Saruhânî

Kaddesallahu Sırrahu'l-Âlî