Muharremdir Tecellîgâh-ı Mevlâ

11 Eylül 2018 tarihinde yayınlanmıştır.

NUTK-İ ŞERÎF

Muharremdir tecellîgâh-ı Mevlâ

Muharremdir cemâle râh-ı kusvâ

Muharrem oldu mâtem-gâh-ı sâdât

Muharremdir 'ibâdet-gâh-ı zîbâ

Muharremdir bahâr-ı hüzn ü endûh

Muharrem maşrık-ı necm-i belâyâ

Muharremdir mehârimden muharrem

Muharremdir şuhûr içre mükerrem

Muharremdir şehâdet mihr ü mâhı

Muharrem itdiren 'uşşâka âhı

Muharremde zuhûr itdi beliyyât

Hevâ-yı Ehl-i Beyt’e geldi âfât

Muharremdir iden çeşmânı çeşme

Muharrem itdiren fettâne fitne

Muharremdir şuhûrda mâh-ı mâtem

Olurlar 'âşıkûn müstağrak-ı gam

Muharremde şehîd oldu imâmeyn

Muharremde garîb oldu hümâmeyn

Muharrem ağlatır 'uşşâkı her dem

Muharrem bahş ider 'uşşâka mâtem

Şeyh Abdurrahmân Sâmî Saruhânî
Kaddesallahu Sırrahu'l-Âlî