Münevver Eyledi İki Cihânı
20 Nisan 2022 tarihinde yayınlanmıştır.
NA'T-I ŞERÎF
Münevver eyledi iki cihânı
Kudûm-i Hazret-i Sultân-ı kevneyn
Zıyâ-bahş etdi bu cism ile cânı
Kudûm-i Hazret-i Sultân-ı kevneyn
Dedi Mevlâ anın şânında levlâk
Sen olmasan yaratmaz idim eflâk
Sivâ levsinden eyler dilleri pâk
Zuhûr-i Hazret-i Sultân-ı kevneyn
Aradan ref' eden mutlak hicâbı
Görür zerrede nûr-i âfitâbı
İşitdirir hitâb-ı müstetâbı
Kudûm-i Hazret-i Sultân-ı kevneyn
Kalanlar berr-i firkat içre atşân
Zülâl-i feyz-i vasla oldu reyyân
Vücûdu katresini kıldı ummân
Kudûm-i Hazret-i Sultân-ı kevneyn
Ne devletdir göre gözler cemâlin
Erişüp zâtına bula sıfâtın
Hakîkat râzının keşf etdi hâlin
Kudûm-i Hazret-i Sultân-ı kevneyn
Nazar eylemeyüp ak u karaya
Sülûkün irgürür râh-ı fenâya
Atâdır dillere bî-hadd ü gâye
Kudûm-i Hazret-i Sultân-ı kevneyn
Kemâ-hî fehm edüp sırr-ı sücûdu
Semâ-yı seb'aya kıldı su'ûdu
Fenâyî mahv edüp zenb-i vücûdu
Kudûm-i Hazret-i Sultân-ı kevneyn
Ehl-i Cennet Fenâyî Mehmed Efendi
Kuddise Sırruh