Münezzeh Zâtı Bahrından Nedir Mevcin Kılan Peydâ
22 Kasım 2020 tarihinde yayınlanmıştır.
NUTK-İ ŞERÎF
Münezzeh zâtı bahrından nedir mevcin kılan peydâ
Ya ol deryâ-yı mutlakdan nedir evvel olan peydâ
Ki zâtı lâ-te'ayyünden haber sormak değil ma'nâ
Anın âsâr-ı feyzinden haber versin bilen peydâ
Çün ol 'ummân-ı a'zamdan kılupdur nûru ol câmi'
Haberdâr ol kim ol nûrdan ne cevherdir olan peydâ
Budur ol yüce nûr-ı zât kılan cümle sıfâtı mât
Ne hâlik oldı ne mahlûk nedir bundan gelen peydâ
Nedir ol zât-ı a'lâdan rızâ taleb kılan evvel
Ana hükm eyleyen sırran rızâ emrin kılan peydâ
Ki ya'nî isteye irzâ bilinmeklik-durur a'lâ
Ki oldur ahsen ü ekber iden 'irfân kılan peydâ
'Amânın 'ilmini evvel ne sırdır eyleyen ihyâ
Ne keyfiyyet kemâlidir kim anda cem' olan peydâ
Sıfâtı bahsinin evvel kadîmî denilen oldur
Hakâyık andan olmuşdur ne kim geldi gelen peydâ
Gelüp 'irfân diler insân ola zâhir nihân ihsân
Ki ol nûrun zıyâsından hakâyıklar kılan peydâ
Nedir ol nûr-ı kand ile gelen ol nûr-ı câmi'den
Ki "illâ hû" kelâmıyla ezel mahlûk olan peydâ
Sinân Ümmî hakâyıkda kim anın pertevindendir
Pes ol burhân-ı a'lâdır anı her dem kılan peydâ
Elmalılı Sinân Ümmî
Kuddise Sırruh