Mürşid-i Sâkî Elinden İç Sekâhüm Şerbetin
15 Mart 2024 tarihinde yayınlanmıştır.
NUTK-İ ŞERÎF
Mürşid-i sâkî elinden iç "sekâhüm" şerbetin
Ey şerâb-ı 'aşk ile mahmûr olan mestâne
Ayağına yüz sürüp al dahi sırr u himmetin
Vâkıf-ı esrâr olup ol dâimâ hayrân-ı Hakk
'Azm-i dergâh-ı Hudâ etsen fedâ-yı cân ile
'Âlem-i kudse erişsen kuvvet-i 'irfân ile
Cân iline hân olan sultânı bulsan şân ile
'Âleme sultân olurdun erişip fermân-ı Hakk
Yâ ilâhî ver tecellî feyz-i rûh u kalb ile
Keşf-i dîdâr eyle yâ Rab kalmayalım gayb ile
Cümle 'uşşâkın sevindir sana vasl-ı kurb ile
Yoluna cânlar verüben olalar kurbân-ı Hakk
Evliyâna lutf u ihsânın olupdur bî-'aded
Bize dahi eyle ihsân yâ Kerîm ü yâ Ehad
Nefs ile Şeytan elinden bizi kurtar kıl meded
Hakk'a irşâd eylesin feyzinle bir merdân-ı Hakk
Sıdk ile Şa'bân Efendi'den dilersen himmeti
Hâdim ol erkânına şevk ile eyle hizmeti
Menzilin olsun bu yolda Âsitân-ı Halvetî
Bu seferde olagör Dervîş Ömer mihmân-ı Hakk
Ömer Fuâdî
Kuddise Sırruh