MuzafferOzak.com (Türkçe)

NUTK-İ ŞERÎF

Mürşid oldur kim demâdem Hakk'ı eyleye 'ıyân
Vech-i pâkinde tecellî eyleye ol bî-nişân

Nutk-i mıknâtıs ola kâbil vücûdun cezbine
Gaşy ola ger tâlibe kılsa nazar bir kez hemân

Hem ledünnî 'ilmini bilmekde Hızr-ı vakt ola
Hakk anda zâhir olup Hakk'la ola her zamân

'Aşk ile ihyâ ede mürde kulûbu dembedem
Feyz-i 'irfânı ile mi'râc ede Îsâ-yı cân

Zâhir ü bâtında her müşkilleri hall eyleye
Kâşif-i esrâr-ı vahdet ola herdem her zamân

'Âlem-i gayb ü şehâdet hep ana mekşûf ola
Cism ola 'âlem ana ol 'âleme rûh-ı revân

Enfüs ü âfâk denilen ana nisbet bir ola
'Âlem-i vahdetde olmaz zîrâ Hakk'a în ü ân

Hâb ü bîdârında her ne kim görürse Hakk diye
Vahdet-i Hakk'dan özün ayırmaya bir dem bir ân

'Aşka tergîb ettirüp 'âdetleri hark etdire
Kalmaya asla berâzih hep 'ıyân ola nihân

Kavl ü fi'l ü hulkunu tehzîb edüp sâfî kıla
'Aks ola âyine-i kalbine anın dü cihân

Bâde-i vahdet suna hem-sohbetine her nefes
Mest ü meczûb etdirüp tayy etdire kevn ü mekân

Nusha-i vahdet olan nefsine ta'lîm eyleye
Günbegün vere terakkî Hakk'a ola tercümân

Tâlibe mâhiyyet-i zât u sıfâtı bildire
"Men 'arefe nefseh" dersinde komaya gümân

Dûra düşmekden kamu 'uşşâkını tahlîs ede
Günbegün mürdelere vere hayât-ı câvidân

Mâ-hasal yüzün görüp sözün işiden Gaybiyâ
"Len terânî" gussasını çekmeye ola şâdımân

Sun'ullah Gaybî
Kaddesallahu Sırrahu'l-Âlî

Mürşid Oldur Kim Demâdem Hakk'ı Eyleye Iyân