MuzafferOzak.com (Türkçe)

Verir insâna hayât-ı tâze

Nağme-i bülbül ü hoş-âvâze

Gûş kıl nağmesini mürgânın

İktizâ eyler ise insânın

Komaz âyine-i hâtırda gubâr
Nağme-i çeng ü ney ü mûsıkâr

Nağme-i şuh-ı hôş-âheng-i beşer

Hâh u nâ-hâh eder insâna eser

Nağme bir mantık-ı rûhânîdir

Nağmenin lezzeti vicdânîdir

Cân-fezâdır nefes-i insânî

Dil-rübâdır nağam-i rûhânî

Hâne-i câna verir nûr-i sürûr
Neş'e-i nağme-i târ u tanbûr

Hazzı var gerçi hoş âvâzların
Dinlenir nağmeleri sazların

Nüsha-i sevke diğer şirâze
Târdan sâdır olan âvâze

Ger hakîkatle olursan sâmi'

Olmaz evkât-ı hayâtın zâyi'

Mûsıkî hikmete dâir fendir

Bilene bilmeyene rûşendir

Ve nice esrârı vâr idrâk edicek

Yer gelir sîneleri çâk edicek

İ'tibârât u tekâsîm u fusûl

İmtiyâzât u makâmât u usûl

Perde vü pîşrev ü savt ü amel

Kâr u nakş u şa'b u kavl u gazel

Her biri hikmet ile memlûdur

Cân riyâzın suvarır bir sudur

Nağme-i yâbis ü hârr u bârid

Çeşme-i mahz-ı hikemden vârid

Her biri bir maraza nâfi'dir

Zıddını her birisi dâfi'dir

Zîr ü bâlâsı hevâdır ammâ

Dâir olur mu hevâsız dünyâ

Bestedir dâire-i evkâta
Üskütüssât ile ahşicâta

Hikem-i kevn ü mekân muzmerdir

Anlamaz lutfunu ol kim kerdir

Sırra dâir dahî var nice kelâm
Ki değil ana mahal gûş-i avâm

Böylece zevkin eder ehl-i reşâd

Eylesin zevkini Allah ziyâd

Urfalı Nâbî

Rahmetullahi Aleyh

Mûsıkî ve Nağme