Ne Kim Sahîfe-i Tedbîre Akl Eder Mastûr
20 Aralık 2022 tarihinde yayınlanmıştır.
KASÎDE DER NA'T-İ HAZRET-İ FAHR-İ MEVCÛDÂT
Ne kim sahîfe-i tedbîre 'akl eder mastûr
Sağınmam anı olur olmaz olmayan makdûr
Hevâ-yi dâr-i vefâ umma her hevâyîden
Kim ol makâmdadır ser-bülend olan Mansûr
Harîf-i erre-i gam sanma her kuru ağacı
Ki yazılır Zekeriyyâ adına ol menşûr
Dil-i pür âteş-i 'âşıkdır âh-i serdle hoş
Olur bürûdete mâil tebâyi'-i mahrûr
Füsürde zâhid eger 'âşık-ı ciğer-sûza
Refâkat etse yüz yıl zulmetine düşmez nûr
Sağınma bir arada ihtilât kılmak ilen
Tutar mizâc-ı karanfil tabî'at-i kâfûr
Hoşem ki 'aşkla rüsvâ-yi hâss ü 'ammem ben
Felek bu şîve ile eylemiş meni meşhûr
Müdâm nakd-i hevâ hâtırımdadır meknûn
Hemîşe fikr-i mehabbet dilimdedir mezkûr
Neçük hevâ ne mehabbet meveddet-i şâhi
Ki halkadır sebeb-i feyz-i Kirdigâr-i gafûr
Meh-i sipihr-i nübüvvet Muhammed-i Kureşî
Çerâğ-i şâm-i ebed âftâb-i subh-i nüşûr
Şehenşehî ki Süleymân-i mülk-i ma'nî olup
Mutî' oldu ana ins ü cinn ü vahş ü tuyûr
Cihânı açmak için tapşuruldu hazretine
Kilîd-i mahzen-i mahrûsa-i vukûf ü şu'ûr
Yetirdi silsile-i târ-i hisâb-i hicretine
Üzülmesin diyüben rişte-i sinîn ü şuhûr
Şikest nukre-i halis-'ayârıma koydu
Iyâr-ı nukre-i zâtında ihtimâl-i küsûr
Ruh u kadidir olan halvet-i cinân içre
Çerâğ-i meclis-i gılmân ü şem’-i mahfil-i hûr
Ne şek ki 'akdı bevâdîde barmağından su
Bu şerhadır mutazammın hutût-i mevc-i buhûr
Muhâlif emrinedir ba'de kim ayağa düşer
Nakîzdir ana kim gûş-mâl alır tanbûr
Eyâ Şehî ki gürûh-i peyamber-i mürsel
Behişte basmaz ayak senden almadan destûr
Egerçi hâmeye el urmadın elinde idi
Hatt-ı betâlet-i İncîl ü nesh-i harf-i Zebûr
Ne söz ki anda senin yok rızâ-yı huddâmın
Kalır serây-i tabî'atda tâ ebed mahsûr
Bırak hicâb nikâbın güzel cemâlinden
Ki tâ göre seni ortada görmeyen nice kûr
Bu mesned içre nice mest-i hâb-ı nâz olasın
Erişdi subh gel aç imdi nerkis-i mahmûr
Fesâd ehli cihâna bırakdı yüz feterât
Kıyâmet oldu ne yatmak mecâlidir örü dur
Zamâne muntazır-ı iktidâ-yi emrindir
Sözün ne ise yürüt buyruğun ne ise buyûr
Fetahtü 'ayne recâi bi-seyfike'l-kâhir
Kad istecertü bihî min 'aduvvike'l-makhûr
Bikeî melâzu ve ente'l-me'âzu fi'd-dâreyn
'Ale's-sırâti izâ hane li'l-enâmi ubûr
Recevtü inneke takza'l-umûra fî-yevmin
Bi emri rabbike kad teürca'u ileyke umûr
Lezimtü zeyleke ercû rızâke fi'd-dâreyn
Kefâ vüsûku recâî bi lutfike'l-mevfûr
Şehâ Fuzûlî-i dil-hasteem bi hamdillah
Reh-i şerî'atine tâbi' emrine me'mûr
Olup-durur sözümün nazm ü nesri na'tinde
Hemîşe gevher-i manzûm ü lü'lü-i mensûr
Fesâhat ehli arasında i'tibârım var
Ne i'tibâr ger olduysa hey'etim mahkûr
Özüm hakîr be-gâyet sözüm müfîd velî
Neçük ki hükm misâlinde satrü beyne's-sutûr
Ümîd var ki tutdukça milk râh-i nizâm
Ümîd var ki taptıkça 'ahd-i ömr mürûr
Mürûr-i 'ömrü senâ-yı Resûl ile geçirem
Ölende anı edem armağan-ı ehl-i kubûr
Fuzûlî