Ne Safâdır Ulemâ Tâlib-i İrfân Olsa
8 Ocak 2022 tarihinde yayınlanmıştır.
NUTK-İ ŞERÎF
Ne safâdır 'ulemâ tâlib-i 'irfân olsa
Mürşidi dahi anın kâmil-i insân olsa
Zerre-veş gösterüben ma'nâda şems olsa hemân
Zâhiri katre olup bâtını ummân olsa
Söylese keşf-i hakâyıkdan olup hâli kavî
Mahzen-i 'ilm-i ledünn olsa vü sultân olsa
Cümle hâlât u kemâlâtı bulurdu tâlib
Cânı cânâna verüp cismi dahi cân olsa
Cennet-i zâta girüp seyr-i cemâle erenin
Görünür mü gözüne hûri vü gılmân olsa
Varmanız nâkıs u nâdân yanına tâlibler
Dervîşi nâkıs eder mürşidi nâdân olsa
Feyz-i rahmânî ile kâmil olurdu tâlib
Ey Fuâdî mürşidi mazhar-ı Rahmân olsa
Ömer Fuâdî
Kuddise Sırruh