Ne Sırdır Bu Ne Hikmet Ehl-i Hakk'da Derd Belâ Çokdur

3 Ocak 2020 tarihinde yayınlanmıştır.

NUTK-İ ŞERÎF

Ne sırdır bu ne hikmet ehl-i Hakk'da derd belâ çokdur

Ki anın dostlarının ekserinde mübtelâ çokdur

Ne 'illetden ne kılletden ne zilletden olur hâlî

Hudâ ehlinde gam gussa elem renc ü 'anâ çokdur

Münâfık mülhid ü zındîk mürâî şâd u handândır

Muhakkak 'ârif ü kâmilde her türlü cefâ çokdur

Bulunmaz sâlik-i sâdık müsellikler çekildiler

Hilâfet iddiâ eden mukallid bî-vefâ çokdur

Şerî'atdan tarîkatdan hakîkatdan tehî desti

Satar şeyhlik hemân halka içinde kîn riyâ çokdur

Sözümüz zâhire bizim değildir bâtın ehline

Kubâb altında Hakk'dan gayrı bilmez evliyâ çokdur

Sıfât-ı nâs ile anlar sıfatlanup bilinmezler

'Avâm şeklinde görünür gürûh-ı asfıyâ çokdur

Sene bin iki yüz elli ve üçdür eyledim tevrîh

Bu târîhde melâmet ehli ahyâr var katî çokdur

Ümmîdi kesme yok mürşid deyu Allah ki Hâdî'dir

Devâm et zikre çün zâkirlere Hakk'dan 'atâ çokdur

Beni çok zikr edin deyu bize emr etdi Kur'ân'da

Ki çok zikr eyleyenlerde ehibbâ-yı Hudâ çokdur

Yaşım yetmiş bire erdi sabâvetden beru zikrim

Hemân tevhîd-i Hakk çün anda esrâr ü safâ çokdur

Bu Kuddûsî teşekkür eyleyüp der zikr ile geldim

Bu pîrlik çağına bildim ki tevhîdde 'alâ çokdur

Ahmed Kuddûsî

Kuddise Sırruh