Nev-Bahâr Erişdi Bîdâr Olayım Şimden Gerü
10 Ocak 2024 tarihinde yayınlanmıştır.
NUTK-İ ŞERÎF
Nev-bahâr erişdi bî-dâr olayım şimden gerü
'Andelîb-i bâğ-ı gülzâr olayım şimden gerü
Dünyâ vü 'ukbâ hevâsından geçip abdâl-veş
Kâşif-i cilbend-i esrâr olayım şimden gerü
Çalayım Mansûr gibi tabl-ı "ene'l-Hakk" nevbetin
Gireyim meydâna berdâr olayım şimden gerü
Dükeli dâr u diyârın raht u bahtın terk edüp
İbn-i Edhem gibi deyyâr olayım şimden gerü
Dolanayım Hızr-veş 'âlem gözünden bir zamân
Mutlak olup sırr-ı Settâr olayım şimden gerü
Nice bir bu ten zemîninde karâr edüp kalam
Çıkayım göklerde devvâr olayım şimden gerü
Bu izâfât u kuyûdât illerin edüp harâb
Lâ-mekân ilinde seyyâr olayım şimden gerü
Mürg-i cânı bu kafesden uçurup şâd edeyim
Ol 'adem şehrine tayyâr olayım şimden gerü
Bir beden kaldı bana mensûb olan bunda hemân
Yok edüp anı dahi vâr olayım şimden gerü
Kalmasın varlıkda Mısrî'nin vücûdu zerrece
Kurtulayım vasl-ı dildâr olayım şimden gerü
Niyâzî Mısrî
Kuddise Sırruh