Neylerem Cân u Cihânı Bana Rahmânım Gerek
1 Ağustos 2020 tarihinde yayınlanmıştır.
NUTK-İ ŞERÎF
Neylerem cân u cihânı bana Rahmânım gerek
Tâ ezel "kâlû belâ"da 'ahd ü peymânım gerek
Bülbülem âh u figânımdan murâdım her nefes
Ol gülistânım bâğında nûr-ı Yezdânım gerek
Bahr-ı mutlak kuşu idim bunda pervâz eyledim
Bu kanadım açdığımdan bahr-ı 'ummânım gerek
Kimdir ol mâhın yolunda var varından geçmeyen
Cân fedâ olsun yolunda bana cânânım gerek
'Akl u cân kevn ü mekânın terkini kâr eyledi
Varlığından el çeküp der sırr-ı Sübhânım gerek
Bî-nişân u lâ-mekân iklîmine kıldım nazar
Gayrıdan yokdur murâdım yine seyrânım gerek
'Aşka uydum Mustafâ devrinde geldim 'âleme
Giderem âh-ı fırâkım şâh-ı kârbânım gerek
Ol hakâyık iklîminde dürr-i bi-hemtâ idim
Mevc ile geldim cihâna bana ol kânım gerek
Ol safâ şehrinde her dem 'ilm-i Hakk mihmânıyam
Kâl u kıyl benden gerekmez 'ilm ü 'irfânım gerek
Pâdişâh-ı lâ-yezâlin şem'ine pervâneyem
'Aşka fermân olduğumdan yine ol hânım gerek
Der mehabbet denizinden nûş ederdim 'akl u cân
Bu Sinân Ümmî gerekmez bana erkânım gerek
Elmalılı Sinân Ümmî
Kuddise Sırruh