Nice Bir Mecnûn-veş Dîvânesin Dîvânesin
17 Mart 2021 tarihinde yayınlanmıştır.
NASÎHAT
Nice bir mecnûn-veş dîvânesin dîvânesin
Kendine gel ola ki uslanasın uslanasın
Hâb-ı gaflet içre gitdi ömr-i azîz ey gönül
Geçdi günler ne zamân uyanasın uyanasın
Kendini ağyâra mahrem eyledin hayfâ sana
Yâr ile yâr olmadın bîgânesin bîgânesin
Zikr ü fikr ile gönül evini ma'mûr etmedin
Zâhirin ta'mîr ile vîrânesin vîrânesin
'Ayn-ı beytullah-durur kalbine sâhib olmadın
Kapladı nefs ü hevâ puthânesin puthânesin
Kesrete verdin derûnu sırr-ı vahdet bilmedin
Ger basîret eyledin yek dânesin yek dânesin
Ger cihân şehbâzı olsan sana demem pehlivân
Nefse gâlib isen eğer merdânesin merdânesin
Yakmadın 'aşk âteşine nefs ü hevâ vârını
Mâsivâ nârıyla çün sûzânesin sûzânesin
Şem'-i Hakk'a Sûziyâ devr eylegil pervâne-veş
Dost huzûrunda ola ki biryânesin biryânesin
Ahmed Sûzî
Kuddise Sırruh