Nice Bir Tâlib-i Dünyâ Olasın
18 Ekim 2020 tarihinde yayınlanmıştır.
NUTK-İ ŞERÎF
Nice bir tâlib-i dünyâ olasın
Nice bir târik-i 'ukbâ olasın
Nice bir râgıb-ı dünyâ olasın
Nice bir fâriğ-i Mevlâ olasın
Nice bir heves-i tûl-i emel
Nice bir savm u salât içre halel
Nice bir hizmet-i Mevlâ'da kesel
Nice bir câhil-i ma'nâ olasın
Nice bir fi'l-i mekârihle 'amel
Nice bir sehv ü kusûr ile zelel
Nice bir nâs ile beyhûde cedel
Nice bir halkla rüsvây olasın
Nice bir zînet-i destâr u kabâ
Nice bir nefret-i fakr ile abâ
Nice bir ömrünü yok yere hebâ
Nice bir şuğl ile ifnâ olasın
Nice bir nahv u sarf ile emek
Nice bir câze yecûzü demek
Nice bir kesret-i içmekle yemek
Nice bir ekûl-i helvâ olasın
Nice bir gayret-i nâmûs ile 'âr
Nice bir şehvet ü şeytân ile kâr
Nice bir gaflet mânend-i hımâr
Nice bir mûnis-i çâr-pâ olasın
Bu kadar zâhirini âbâd etdin
Bu kadar bâtınını berbâd etdin
Bu kadar nefsini şâd etdin
Nice bir tâbi'-i a'dâ olasın
Bu revîş ile bulunmaz matlûb
Bu gidiş ile bulunmaz mahbûb
Bu sülûk ile olunmaz mergûb
Nice bir mâil-i hülyâ olasın
Başını taşa çalup zâr edegör
Cismini 'aşk ile pür nâr edegör
Seherin vird ile ezkâr edegör
Nice bir sâlik-i rü'yâ olasın
Bu kadar cürm ü kusûru olan
Te'accüb etmeye âh ile figân
Yüzünü yerlere sür derd ile yan
Nice bir 'ucb ile bâlâ olasın
Açuben kalbini yu pası gider
Duyasın remz-i me'ânîden eser
Gözün aç 'ibret ile eyle nazar
Nice bir hikmete a'mâ olasın
Yürü bir mürşid-i kâmile ulaş
Kademinde koyagör cân ile baş
Eşiğinde dökegör kan ile yaş
Sûziyâ vâsıl-ı kimyâ olasın
Ahmed Sûzî
Kuddise Sırruh