Niçün Nûr-i İlâhîden Kaçar Îmâna Gelmezsin
25 Şubat 2020 tarihinde yayınlanmıştır.
NUTK-İ ŞERÎF
Niçün nûr-i ilâhîden kaçar îmâna gelmezsin
Seninçün münzel olmuşdur niçün Kur`ân'a gelmezsin
Semâvâtdan hitâb olan sana tevhîd değil midir
Gözünden perdeyi kaldır niçün burhâna gelmezsin
Dedirtdiler dedim bunu inanırsan bu tevhîde
Yürekde vâr iken derdin niçün dermâna gelmezsin
Dokuz türlü maraz sende gözün görmez kulûbünde
Şifâlık bulmağa ana niçün Lokmân'a gelmezsin
Velîlerin hakîkati dilindeki ma'rifeti
Senin nefsin eder ıslâh niçün fermâna gelmezsin
Deme işitme çok olur murâd olan bu ma'nâdır
Geçüp nâmûs u ârından niçün merdâne gelmezsin
Nice ma'mûr olasın sen çü sen fânî cihân fânî
Ki kenzi bulmağa hâlen niçün vîrâna gelmezsin
Bu cân ma'şûk sözün söyler kelâmın gayrısın bilmez
Tükenmez hânı sultânın niçün ihsâna gelmezsin
Yüzü güldür saçı sünbül anın ismi Muhammed'dir
Cemâli bâğına anıın niçün seyrâna gelmezsin
Kemâlinden gelüpdirsin gönülden ver salavâtı
Açılmış verd-i handândır niçün reyhâna gelmezsin
Misâlin bulmadım bunda tenin gibi lezîz helva
Yiyenden tadını sorup niçün hayrâna gelmezsin
Dîvânesin akıl yokdur kaçarsın nûr-i tevhîdden
Görüp mercân çıkarmağa niçin ummâna gelmezsin
Sözü hatm-i kelâm etdim bu ma'nâdan anlamazsın
Tarîk-i müstakîm içre giden kerbâna gelmezsin
Kelâmullah yeter şâhid muvahhid âşıka zâhid
Nebîlerden velîlere değin erkâna gelmezsin
Vehâbî sırr ile söyler nihân ilmin sana her dem
Haber sormağa vechinden niçün irfâna gelmezsin
Abdülvehhâb Ümmî
Kuddise Sırruh