Nimet-i Uzma-yı Cemiyyetde İdik Bir Zaman
8 Eylül 2023 tarihinde yayınlanmıştır.
NUTK-İ ŞERÎF
Ni'met-i 'uzmâ-yı cem'iyyetde idik bir zamân
Düşdük andan bu 'azâb-ı gaflet ü cehle yamân
Âşinâ-yı Hakk iken bîgâne olduk bî-gümân
'Ayn-ı beytullah iken puthâne olmuş dil hemân
Hâzır-ı Hakk ol huzûr et gâfil olma her zamân
Hâzır ol kim ni'met-i cem'iyyet-i hâtır O'dur
Gâfil olma kim 'azâb-ı tefrîka-i hâzır O'dur
Hakk'a candan kıl teveccüh kalbine nâzır O'dur
Evvel ü âhir O'dur hem bâtın ü zâhir O'dur
Hâzır-ı Hakk ol huzûr et gâfil olma her zamân
Cehl ü havf ü gam gadab hep gaflet ü nisyândadır
Gâfil olan sû-i hulkuyla yanar nîrândadır
'Ârif-i âgâh olan cân rahmet-i Rahmân'dadır
Gark-ı bahr-ı vahdet olmuş cennet-i 'irfândadır
Hâzır-ı Hakk ol huzûr et gâfil olma her zamân
Âb ü nânı koy bu cisme zikr-i Hakk olsun idâm
Zevk-ı zikrullah ile dil mutmain olsun tamâm
Hayrete var kim odur dil beytine bâbü's-selâm.
Hakk ile her hâlde ol tâ ol senin ola müdâm
Hâzır-ı Hakk ol huzûr et gâfil olma her zamân
Ey gönül her ne dilersen sende iste sende bul
Ger saâdet-mend isen kendinde bul ol dosta yol
Râh-ı hayretden huzûr-ı Hazret'e eyle duhûl
Mâsivâdan fâriğ ol aşkın deminden pür-dem ol
Hâzır-ı Hakk ol huzûr et gâfil olma her zamân
Nefsini lâ şey bilen dil Hakk bilir âgâh olur
Rü'yet ü sem' ü kelâmı her işi Allah olur
Cümle eşyâdan ona bir ân temâşâ-gâh olur
Kande olsa Hakk anınla dâima hem-râh olur
Hâzır-ı Hakk ol huzûr et gâfil olma her zamân
Hakkı Hakk'dan gâfil olma hâzır ol eyle huzûr
Dil nazargâh-ı Hudâ'dır sâf kıl kim dola nûr
Şah damarlardan yakındır Hakk sana sen olma dûr
Vehm ü fehm ü fikri koy dal hayrete ol pür-sürûr
Hâzır-ı Hakk ol huzûr et gâfil olma her zamân
Erzurumlu İbrâhim Hakkı
Kuddise Sırruh