Nûr-i Îmân İle Kıl Kalbin Yed-i Beyzâ Gibi
23 Aralık 2020 tarihinde yayınlanmıştır.
NASÎHAT
Nûr-i îmân ile kıl kalbin yed-i beyzâ gibi
Kâf-ı cismin tâ tecellîgâh ola Sînâ gibi
Nârını nûr eyle 'aşkın 'âşık-ı dîdâr isen
Bak Halîl'e kıldı nârı cennetü'l-me'vâ gibi
Varlığın terk eyle dâim cümleden tecrîd olup
Mürdeler ihyâ edesin Hazret-i 'Îsâ gibi
Fakr ile fahr etdi cümle enbiyâ vü evliyâ
Kıl kanâ'at sen dahi ol kenz-i lâ-yefnâ gibi
Hamse-i Âl-i Abâ'ya sıdk ile ver gönlünü
Bendesinin bendesi ol çâker-i ednâ gibi
'Ârif ol 'ilm-i ledünnden ders alup Allah'ı bil
Kalma kıyl ü kâl içinde vâ'iz-i hülyâ gibi
Aç gözün gaflet uykusundan uyan gel vahdete
Gezme gâfil 'âlem-i kesretde nâ-bînâ gibi
Emr-i Hakk'ı tut sücûd eyle cemâl-i âdeme
Sâcid ol dîdâr-ı yâre Ka'be-i 'ulyâ gibi
Sen seni bilmek içün bir mürşide tapşır özün
Hırz-ı cân et sözlerin ol mürşidin kimyâ gibi
Hırka-pûş ol gir erenler bezmine dervîş olup
Hizmet et bâb-ı rızâda 'abd-i pâ-ber-câ gibi
Hakk kelâmın ravza-i fikrinde gars et nâtık ol
Bâr-ver olsun sözün her sâile Tûbâ gibi
Hakk yolunda müstakîm ol er makâm-ı vahdete
Menzilin 'âlî ola dehr içre heft âbâ gibi
Kıl tevekkül Hakk'a tefvîz-i umûr et râhat ol
Her işin cârî olur 'âlemde bir mecrâ gibi
Sil süpür buğz u hased hırs u tama'dan cân evin
Pâk ola mir'ât-ı kalbin gevher-i yektâ gibi
Gayzını hazm eyle nefsin hiddetin terk eyleyüp
Kâzımîn ol nâsı incitme sakın a'dâ gibi
Teşnegân-ı lutfunu kandır mey-i eşfâk ile
Neş'e ver kalb-i hazîne sâkî-i sahbâ gibi
Geç nazar kılma 'ayb-cû olma nâsa hürmet et
Gezmek istersen eğer bâşda gül-i hamrâ gibi
Tut elin efkarların gönlün alup ihsân ile
Tâ çekilsin hâk-i pâyin gözlere tûtiyâ gibi
Hakk Te'âlâ seyyiâtın afv edüp rahmet eder
Bir yetîme şefkat eylersen ana baba gibi
Garre olma mâl u evlâd u 'ıyâl u sıhhate
'Ömr-i âdem tîz geçer dehr içre bir rü'yâ gibi
Bir akar sudur civânlık hüsnüne etme gurûr
Bir zaman sonra bakılmaz rûyine sermâ gibi
Çünki bildin kim bekâsızdır bu ikbal-i cihân
Yâ neye mağrûrsun âlemde sen ibkâ gibi
Kimseye bâkî değil tâc u kabâ-yı saltanat
Hâkim olsan âleme İskender ü Dârâ gibi
Nice hâkânın sarâyı hâk ile yeksân olup
Lâne-i bûm olmuş âhir kubbe-i kisrâ gibi
Çünki değmez zevk-i dünyâ çekdiğin mihnetlere
Bir kuru nân-pâre yetmez mi sana helvâ gibi
Gıll ü gışdan kalbini pâk eyle merd-i hâss isen
Giy ferâgat tâcını dervîş-i bî-pervâ gibi
Sîm ü zer sanma nukûd kîsede akrebdir ol
Halka-i tuğyânına almış seni hayyâ gibi
Şehvet ü şirk-i riyâdan nefsini eyle halâs
Ki sakın aldanmayasın tâlib-i dünyâ gibi
Niceler aldandılar bu hacle-gâh-ı fânîde
Gösterir kendin bu dünyâ bir zen-i zîbâ gibi
'Âmil ol Hilmi Dede eyler sana pend ey ahî
Gûş-vâr eyle nutku gevher-i garrâ gibi
Dâhil-i bezm-i fenâsın 'âkıbet ölsen gerek
Sanma sen kendin bu fânî yerde müstesnâ gibi
Hilmi Dede
Kuddise Sırruh