Ol Dost'u Ben Sevdiğim Bu Cânımdan İlerü
8 Eylül 2021 tarihinde yayınlanmıştır.
NUTK-İ ŞERÎF
Ol Dost'u ben sevdiğim bu cânımdan ilerü
Ol Dost'u ben gördüğüm bu gözümden ilerü
Ezel ebed olmadan sohbetim anınlaydı
İşidirdim sözünü bu gûşumdan ilerü
Ben kul idim ol Sultân olmamışdı ins ü cân
Okur idim medhini bu dilimden ilerü
İlk ol mu sevdi beni ya ben mi sevdim anı
Ol beni sevmiş idi ben sevimden ilerü
Sevdi beni yaratdı 'âşkın oduna atdı
Aldı bu gönlü gitdi şol gönlümden ilerü
Ben o yerden 'âşıkdım 'aşka evvel erişdim
Sevişirdik anınla ilerümden ilerü
Levh u kalem yoğ idi ben anda pinhân idim
Key anınla kande idim benliğimden ilerü
Andan kaynadım taşdım geldim gurbete düşdüm
Nice göz yaşı saçdım bu yaşımdan ilerü
Hâlim dilim bilinmez derde dermân bulunmaz
'Alemde bir derd yokdur bu derdimden ilerü
Derdim dinmez dil ile âhım inildim ile
Kimseler âh etmedi bu âhımdan ilerü
Her bir 'âşık bu 'aşkdan bir türlü nişân dedi
Biri nişân demedi nişânımdan ilerü
Eşrefoğlu Rûmî'yem söylerim Dost haberin
Bir haber dahi yokdur haberimden ilerü
Eşrefoğlu Rûmî
Kuddise Sırruh