Ol Ezel Bezminde Mestân Olmuş İdik Biz Müdâm
11 Eylül 2020 tarihinde yayınlanmıştır.
NUTK-İ ŞERÎF
Ol ezel bezminde mestân olmuş idik biz müdâm
Nice demler dost ile vahdetde olmuşdu kelâm
Dil huzûr-ı Hakk'la etmiş idi tahsîl-i merâm
Âşinâ-yı Dost iken bîgâne düşdük biz tamâm
Gâfil olma zikr ü fikr-i Hakk ile olgıl müdâm
Gel gönül eyle tahammül bu cihân âlâmına
Çünkü düşdün gaflet ile nefs ü şeytân dâmına
Uymayalım onların ef'âline bed kâmına
Cidd ü sa'y ile erelim kârımız encâmına
Gâfil olma zikr ü fikr-i Hakk ile olgıl müdâm
Az yiyelim az içelim kıllet-i nevm edelim
Sû-i hulku terk edelim hüsn-i hulka erelim
Hakk'a tâbi' olalım gel Hakk yoluna gidelim
Bu fenâ dünyâda şöhret ü devleti pes nidelim
Gâfil olma zikr ü fikr-i Hakk ile olgıl müdâm
Cân u dilden edelim Hakk'a teveccüh ey oğul
Nûr ile pür nûr olalım hayrete varsın gönül
Geç bu lezzât-ı cihândan maksûd olan Hakk'ı bul
Dinler isen sözümü gel evvel âhir Hakk'ı bul
Gâfil olma zikr ü fikr-i Hak ile olgıl müdâm
Beyt-i Mevlâ'dır gönül puthâne etdin sen seni
Mâsivâ ile mülevves oldu bu Hakk madeni
'Aşk-ı Hakk ile pür olsun ol cevâhir mahzeni
Gönlüne gel etme gaflet tâ bilesin sen anı
Gâfil olma zikr ü fikr-i Hakk ile olgıl müdâm
Meyl-i dünyâ ile şâhım gönlünü etdin harâb
Sen hümâ-yı kudsîsin çirkâba düşdün ke'z-zübâb
Nice bir cîfeye tâlib olasın misl-i kilâb
Fehm edersen bu hadîsdir oku dilden ol kitâb
Gâfil olma zikr ü fikr-i Hakk ile olgıl müdâm
Ehl-i dünyâ arasından çıkalım gel el-amân
Bu hevâlar ile billah nefsimiz oldu yamân
Gel huzûr-ı Hakk ile bu gönlü kılalım cinân
Dost ile dost olalım birlikde ola cânâne cân
Gâfil olma zikr ü fikr-i Hakk ile olgıl müdâm
Ey dilâ 'aşk âteşiyle mâsivâyı yakalım
Nefs-i serkeş boynuna tevhîd habli takalım
Durmayalım su gibi gel Hakk yoluna akalım
Bu fenâya arka verip Hakk'dan yana bakalım
Gâfil olma zikr ü fikr-i Hakk ile olgıl müdâm
"Men 'aref" sırrına mazhar olalım 'irfân ile
Gönlümüz ma'mûr edelim tevhîd ü îmân ile
Zâhiri tezyîn edelim yol ile erkân ile
Sûziyâ pervâne-veş gel yanalım sûzân ile
Gâfil olma zikr ü fikr-i Hakk ile olgıl müdâm
Ahmed Sûzî
Kuddise Sırruh