Ol Kim Cûş u Hurûş Eyler Ezelden Mest ü Hayrândır

1 Aralık 2023 tarihinde yayınlanmıştır.

NUTK-İ ŞERÎF

Ol kim cûş u hurûş eyler ezelden mest ü hayrândır

İçüp câm-ı elestden ol gezer her yerde 'uryândır

Reh-i 'aşk içre 'âşıklar bugün koçlar gibi başın

Verir cânlar dirîğ etmez erer ol 'ıyde kurbândır

Silerler tîğ-i gayretle gönül mir'âtın 'âşıklar

Görürler 'âlem-i gaybı kim anlar nûr-ı Rahmân'dır

Girüp dil hânesinden ben ezel mi'mârının nakşın

 Temâşâ eyleyüp gördüm hakîkat özge seyrândır

Bulup dil Yûsuf'un şâhım özünden el çeken 'âşık

Otursun tahtgâhında ki ol cân Mısr'a sultândır

Bu sırrın mâverâsından haberdâr olmayan zâhid

Ne bilsin kalb-i insânı ki o bir bağlı hayvândır

Nedir bu sözlerin bilsem ne kânın gevherindendir

Ne deryâdan çıkardın sen bu dil kim sende mihmândır

Bugün 'âlemde ey Nakşî sen ol deryâ-yı hikmetden

Ne dürler kim nisâr etdin sana Hakk'dan ol ihsândır

Nakşî-i Akkirmânî

Kuddise Sırruh