Olmasa Ger Neş’e-i Câm-ı Cihân-ârâ-yı Aşk
7 Eylül 2021 tarihinde yayınlanmıştır.
NUTK-İ ŞERÎF
Olmasa ger neş'e-i câm-ı cihân-ârâ-yı 'aşk
Bezm-i gîtî ile olmazdı kamû şeydâ-yı 'aşk
Tâ ezel hâkinde tahmîr olunup belvâ-yı 'aşk
Tıynet-i Âdem'de konmasa ezel sevdâ-yı 'aşk
Cenneti bir dâneye satmazdı ol dânâ-yı 'aşk
Gelmedin bu sâhil-i sırr-ı vücûda bîş ü kem
Serteser olmuşdu 'âlem garka-i bahr-i 'adem
Keşf içün "ahbebtü en u'rife" rumûzun dembedem
Kenz-i mahfîden vücûda geldi eşyâ lâ-cerem
Bâd-ı hubb ile temevvüc etdi çün deryâ-yı 'aşk
Her kime sunduysa câm-ı bezm-i 'uşşâkı felek
Mest-i şeydâ-veş gezer mecnûn gibi tenhâ vü tek
Sûbesû her gördüğün Leylâ sanır bî-rayb u şek
Tâlib-i dîdâr olup ayılmaya tâ haşre dek
Kim ki ede ezel bezminde ger sahbâ-yı 'aşk
Ehl-i 'aşkın hâletin lâzım değil şerh u beyân
Eşk-i çeşm-i derdi derdiyle olur sırrı 'ayân
'Âşıkı ta'n itme kılmazsın deyu 'aşkı nihân
'Aşk u meşk olmaz nihân anı bilir halk-ı cihân
'Âşık-ı şûrîdeye mümkün müdür ihfâ-yı 'aşk
'Âşık-ı dildârı olan dâim çeker derd ü te'ab
Zâr u sergerdân u giryân olsalar olmaz 'aceb
Hubb-i Azrâ Vâmık'ı nâlân idüp her rûz u şeb
'Aşk-ı Şîrîn oldu feryâdına Ferhâd'ın sebeb
Ey nice dânâyı Mecnûn eyledi Leylâ-yı 'aşk
Sînesinde arz idüp gülşende hanîn lânesin
Tâzeler her demde bülbüller çeker pergâlesin
Görüben hâkisterin olmuş ten-i pâmâlesin
Bülbülün hâlin bilenler gûş iderler nâlesin
Bir gül-i bî-hâr içündür bunca hûy ü hây-ı 'aşk
'Aşk-ı yâre Şerhiyâ her tîre-dil kılmaz heves
Lâyık olmaz lem'a-i envâr-ı Hakk'a cümle kes
Bulamaz gencişk pervâz-ı hümâya dest-res
Ey Hüdâyî hâlet-i 'aşkı ne bilsin her meges
Kulle-i Kâf-ı hakîkat mürgüdür ankâ-yı 'aşk
Azîz Mahmûd Hüdâyî Hazretlerinin nutk-i şerîfi üzerine Şerhî Efendi'nin tahmîsidir.