MuzafferOzak.com (Türkçe)

NUTK-İ ŞERÎF

Öyle mahmûrum ki bilmem bâde-i hamrâ nedir

Cân nedir kendim neyim ibdâ-yı mâ inşâ nedir

Tâ ki medhûş olmuşam ben bilmezem uhrâ nedir

Öyle sermestem ki idrâk etmezem dünyâ nedir

Ben kimim sâkî olan kimdir mey-i sahbâ nedir

Mürg-i rûha zülf-i leylâdan yine dâm isterem

Çeşm-i mestinden safâ-yı kalb içün câm isterem

Bilmezem ben kâmımı ger tab'ımı râm isterem

Gerçi canândan dil-i şeydâ için kâm isterem

Sorsa canân bilmezem kâm-ı dil-i şeydâ nedir

'Aşkdan müstazhar eyler 'âşıka fikr-i visâl

Fark kılmaz sadmet ü 'izz ü cemâl ile celâl

'Âşık-ı şeydâya yeğdir lezzeti hicr ü visâl

Vasldan çün 'âşıkı müstağnî eyler bir hayâl

'Âşıka ma'şûkdan her dem bu istiğnâ nedir

Vahdet içre kesret ü varlık gören 'ârif değil

Lezzet-i cânân içün tâ'at kılan 'ârif değil

'İlm-i hikmetle riyazâtlı olan 'ârif değil

Hikmet-i dünya vü mâ fîhâ bilen 'ârif değil

'Ârif oldur bilmeye dünyâ vü mâ fîhâ nedir

Hâlisâ sît ü figânın doldurupdur 'âlemi

Nâle-i dilsûz-i zârın titretüpdür 'âlemi

Âteş-i âhın serâser yandırupdur 'âlemi

Âh u efgânın Fuzûlî incidüpdür 'âlemi

Ger belâ-yı 'aşkda hoşnûd isen kavgâ nedir

Abdurrahman Hâlis Talebânî el-Kerkükî Hazretlerinin Fuzûlî'nin gazeli üzerine tahmîsidir.

Öyle Mahmûrum ki Bilmem Bâde-i Hamrâ Nedir