Pîşvâ-yı Mürşid ü Pîr-i Muazzamsın Meded
25 Temmuz 2023 tarihinde yayınlanmıştır.
.jpg)
NA'T-I ŞERÎF
Pîşvâ-yı mürşid ü pîr-i mu'azzamsın meded
Hem şeh-i sâhib-tarîkat hem mükerremsin meded
Ser-firâz-ı mukbil-i hem nev'-i âdemsin meded
Nesl-i pâk-i bâ'is-i mevcûd-ı 'âlemsin meded
Cümlenin 'indinde makbûl ü müsellemsin meded
Kutb-ı 'âlem gavs-i a'zam zât-ı ekremsin meded
Oldu 'Abdülkâdir-i Geylâni nâm u şöhretin
Hep bilir bây u gedâ arz u semâ mâhiyyetin
Dâimâ pervâz iderken şâh-bâz-ı himmetin
Sâlike cây-ı emândır âsitân-ı devletin
Cümlenin 'indinde makbûl ü müsellemsin meded
Kutb-ı 'âlem gavs-i a'zam zât-ı ekremsin meded
Nazm u nesr ile beyân olmaz velî keyfiyyeti
Kıyl ü kâl ile bilinmez gerçi vecd ü hâleti
Lîk kadr ü şânını terfî' içün gör rütbeti
Sana mahsûs eyledi Hakk mesned-i ferdiyyeti
Cümlenin 'indinde makbûl ü müsellemsin meded
Kutb-ı 'âlem gavs-i a'zam zât-ı ekremsin meded
En fakîr abdâlının sâyeñde ey 'âlî-tebâr
Pul kadar 'aynında yokdur olsa mâl-i bî-şümâr
Hırka vü tâc u 'abâ ile ider 'arz-ı vakâr
Hazretinle sâlikân eyler cihânda iftihâr
Cümlenin 'indinde makbûl ü müsellemsin meded
Kutb-ı 'âlem gavs-i a'zam zât-ı ekremsin meded
Bir kalender bendene ger itsen 'ibretle nigâh
Çıkarur ceyb-i 'abâsından nice bin pâdişâh
Mest ü bî-hûş eylemişdir cümlesin 'aşk-ı İlâh
Eyler iksîr-i füyûzâtın eser bî-iştibâh
Cümlenin 'indinde makbûl ü müsellemsin meded
Kutb-ı 'âlem gavs-i a'zam zât-ı ekremsin meded
Halka-i bâb-ı rızâda tâ'ata şâm u seher
Belleri bağlı deyü îmâ ider gûyâ kemer
Sanma zâhid bî-sebeb dervîşler devrân ider
Cân kulağıyla kudûm ü mazharı gûş it ki der
Cümlenin 'indinde makbûl ü müsellemsin meded
Kutb-ı 'âlem gavs-i a'zam zât-ı ekremsin meded
Ravza-i pâkinle ol cây oldı çün huld-ı berîn
Anın içün 'âşıka Bağdâd uzak olmaz hemîn
İntisâba ben de bu takrîb ile buldum zemîn
Yoksa meddâh olamaz sana Şeref gibi hazîn
Cümlenin 'indinde makbûl ü müsellemsin meded
Kutb-ı 'âlem gavs-i a'zam zât-ı ekremsin meded
Şeref Hanım
Rahmetullahi Aleyhâ