MuzafferOzak.com (Türkçe)

NUTK-İ ŞERÎF

Rabbini bilmek dilersen sen eğer 'ayne'l-yakîn

Nefsini bil kim nedir aslın düşün Hakk hikmetin

Çün peder sulbünde bir katre su idin bilmiş ol

Ana rahmine akuban anda durdun nice hîn

Anda kırk gün meks edüben kana oldun munkalib

Gör nice halk ider imiş kulu Rabbü'l-'âlemîn

Pes durub kırk gün dahi oldun hemân bir mudga et

Sonra endâmın seçildi cümlesi hem yer yerin

Sûreti düzen melek düzdü kamu a'zânı hem

Verdi cân Hallâk-ı 'âlem buldun insân hey'etin

Eyledi anda gıdâ kânı sana Rezzâk-ı halk

Dokuz ay olunca buldun bu cihânın 'izzetin

Verdi tedrîc ile kuvvet türlü ni'met hem sana

Kudretiyle eyledi bu cismini hısn-ı metîn

İç ü dışında olan esrâr ü âyâtı kamu

'Aklını bâşına der eyle tefekkür cümlesin

Cümle a'zânı düşün sıdk ile başdan ayağa

Bil Hudâ'nın sendeki olan kemâl-i kudretin

Pes dokuz cevherden olmuşdur mürekkeb bu beden

Dördü atanın menîsinden olur hâsıl hemîn

Biri ol dördün kemik biri sinir biri damar

Birisi dahi deridir kıl te'emmül ey emîn

Hem beşi ana menîsinden et ile kan ilik

Kıl ile yağ bu dokuzdur bil beden cevherlerin

Çift olan a'zâ berâberdir biri birine hep

Kudret-i Hallâk'a bunlar dahi bürhân-ı mübîn

Baş topak gözün yeri çukur durur burun yüce

Burma burmadır kulaklar bunların bil sırların

Zühd ile kimse dalamaz ma'rifet deryâsına

'Aşk ile dalınır ancak çünki ka'rı pek derin

Sen de Kuddûsî tefekkür bahrine dal 'aşk ile

Çün ana her kim dalarsa ol bulusar dürlerin

Ahmed Kuddûsî
Kuddise Sırruh

Rabbini Bilmek Dilersen Sen Eğer Ayne'l-Yakîn