Rahmetinle Çünki İnsân Eyledin

15 Haziran 2020 tarihinde yayınlanmıştır.

MÜNÂCÂT

Rahmetinle çün ki insân eyledin

Visâlinden bizi mahrûm eyleme

Ehl-i İslâm ehl-i îmân eyledin

Cemâlinden bizi mahrûm eyleme

Kulun cürmü yanında gerçi çokdur

Sana dönmeğe hergiz yüzü yokdur

Velî ihsânına nihâyet yokdur

Visâlinden bizi mahrûm eyleme

Geçmesin boynuma sivâ kemendi

Garîbindir esirge derdmendi

Dermân senden olur âhir Efendi

Cemâlinden bizi mahrûm eyleme

Nice zamân senden gayrıya akdım

Nice zamân adım dervîşe takdım

Yeter boynum eğüp ırakdan bakdım

Visâlinden bizi mahrûm eyleme

'İbâda dâim işin fazl u ikrâm

Sanadır ilticâmız yâ zü'l-ikrâm

Nola ger eyleyüp ihsânın itmâm

Cemâlinden bizi mahrûm eyleme

Nefsim beni yaban yerlere atdı

Gönül nice zamân firkatin çekdi

Geldi hasret nihâyetine yetdi

Visâlinden bizi mahrûm eyleme

Nice bir mâni' ola fânî vücûd
Edelim 'âlem-i lâhûta su'ûd

Müyesser eyleyüp hakkânî şühûd

Cemâlinden bizi mahrûm eyleme

'Aşkından yanmış garîbin hakkıyçün
Şevk eylediğin tabîbin hakkıyçün
Ümmet etdiğn Habîbin hakkıyçün
Visâlinden bizi mahrûm eyleme

Abdullah kapunda bîçâre kuldur
Düşdüğü yerlerde elin al kaldır

Efendi rahmetin gufrânın boldur
Cemâlinden bizi mahrûm eyleme

Abdullah Bîçâre
Kuddise Sırruh