Rıfk Eylemen Dostlar Bana Uzletde Buldum Rahatı
12 Temmuz 2020 tarihinde yayınlanmıştır.
Rıfk eylemen dostlar bana uzletde buldum rahatı
Etdi terahhum çün Hudâ uzletde buldum rahatı
Dünyâda cennet vâr imiş âşık ana uğrar imiş
Halvet ne hoş gülzâr imiş uzletde buldum rahatı
Halvetde bulunur huzûr halvetde dolar kalbe nûr
Hakk ile üns anda olur uzletde buldum rahatı
Zann etmeniz mihnetdeyim çün yâr ile sohbetdeyim
Anınla ünsiyyetdeyim uzletde buldum rahatı
Uzlet erenler kârıdır vahşet erenler kârıdır
Halvet erenler kârıdır uzletde buldum rahatı
Halk-ı zamân kalb uğrusu gelmez bana hîç doğrusu
Verir gelen baş ağrısı uzletde buldum rahatı
Kimisi dünyâ tâlibi kimisi ukbâ tâlibi
Az şimdi Mevlâ tâlibi uzletde buldum rahatı
Hultatda çok olur zünûb gaybet dahi sâir uyûb
Uzletde nûrlanır kulûb uzletde buldum rahatı
Yok bu zamanda sâdıkân olan da hep olmuş nihân
Uzlet zamânı bu zamân uzletde buldum rahatı
Hak söyleyen olur zelîl çün ehl-i Hakk gâyet kalîl
Halvetde olmaz kâl u kıyl uzletde buldum rahatı
Halvetde kalb hâlî olur ağyâr gider Mevlâ kalır
Nâsdan kaçan rahat bulur uzletde buldum rahatı
Kuddûsîye etdi Hudâ pes devlet-i uzlet atâ
Der hamd edüp her dem ana uzletde buldum rahatı
Ahmed Kuddûsî
Kuddise Sırruh