Safâ-yı Vaktimi Yâ Rab Eyle Kederden Emîn
1 Haziran 2021 tarihinde yayınlanmıştır.
MÜNÂCÂT
Safâ-yı vaktimi yâ Rab eyle kederden emîn
Tarîk-i havf u recâda hatardan eyle emîn
Sıfât-ı cûduna ârâyiş eyledin zâtım
Sıfât-ı cûdunu yavuz nazardan eyle emîn
Nesîm-i feyzini kıl bahr ü berrde hem-râhım
Hevâ-yı mühlike-i bahr ü berrden eyle emîn
Bu yolda hâle muvâfık refîk ihsân et
Karîn-i bî-haber ü bî-basardan eyle emîn
Ticâret-i seferim nakd-i kîse-i Hızr et
Kemâl-i sûdumu nakz u zarardan eyle emîn
Ser-i niyâzımı bâzâr-ı gamda etme gîrân
Suda'-i keşmekeş-i nef' u dârrdan eyle emîn
Sıyânet et gülümü bâğbân-ı gafletden
Nihâl-i goncemi mekr-i beşerden eyle emîn
Derûn-i 'illet-i gamdan masûn edüp yâ Rab
Vücûd-i gâile-i derd-i serden eyle emîn
'Ulüvv-i kadr ile fer verdin İbn-i Neccâr'a
Binâ-yı kadrini dest-i kaderden eyle emîn
Neccârzâde Rızâ Efendi
Kuddise Sırruh