Safâya Erişen Sôfî Yüzün Zer Gibi Nâb İster
4 Aralık 2020 tarihinde yayınlanmıştır.
NUTK-İ ŞERÎF
Safâya erişen sôfî yüzün zer gibi nâb ister
Muhabbet gencine lâyık gönül mülkün harâb ister
Girüp meyhâne-i şevka diler dâim geze sekrân
Gözü yaşın şarâb edüp ciğerinden kebâb ister
Usanup tumturâkından geçer tâk-ı revânından
Uçup bâğ-ı tarâvetden hemîn genc-i yebâb ister
Yükün tutup 'ibâdetden işin görüp ferâgatden
'İbâdet çün kifâyetden kuruca nân u âb ister
Perîşân güft ü gûlardan kalem-veş kat' eder dilin
Nukûş-ı mâsivâdan sînesin sâde kitâb ister
'Ömür sermâyesin çün ki verüpdür destine nefsin
İnanmayup o hâinden gece gündüz hisâb ister
Edüp nefsine töhmetler verir ana cerâhatler
Katına kim gelir anın 'uyûbundan cevâb ister
Su gibi her yere akmaz kimi görse ana bakmaz
Sabî-veş kışra aldanmaz selâmetle lübâb ister
Kafesde kuş gibi zindân-ı 'âlemde olup Şemsî
Halâs oldukda mahbesden cenâbından meâb ister
Şemseddîn Sıvâsî
Kuddise Sırruh