Şâh-ı İklîm-i Hüdâsın Yâ Aliyye'l-Murtazâ
1 Mayıs 2021 tarihinde yayınlanmıştır.
NUTK-İ ŞERÎF
Şâh-ı iklîm-i hüdâsın yâ Aliyye'l-Murtazâ
Tâcidâr-ı evliyâsın yâ Aliyye'l-Murtazâ
Ma'den-i dürr-i se'âdet sırr-ı Sultân-ı rusul
Menba'-i cûd ü sehâsın yâ Aliyye'l-Murtazâ
Hâkipâkin tûtiyâ-yı çeşm-i cân ola n'ola
'İllet-i kalbe devâsın yâ Aliyye'l-Murtazâ
Bârigâhında velîler oldular hep cârub-keş
Pâdişah-ı dü-serâsın yâ Aliyye'l-Murtazâ
Kal' edüp bir darb ile bâb-ı metîn-i Hayber'i
Ya'ni sen Şîr-i Hudâ'sın yâ Aliyye'l-Murtazâ
Zâhir ü bâtın Hüsâmî lutfunu eyler ümîd
Bir kerem-kân-ı 'atâsın yâ Aliyye'l-Murtazâ
Ahmed Hüsâmî
Kuddise Sırruh