Şâhâ Maşûkun Senin'çün Sana Etdi İktirâb
6 Şubat 2021 tarihinde yayınlanmıştır.
NUTK-İ ŞERÎF
Şâhâ ma'şûkun senin'çün sana etdi iktirâb
'Âlemi tarh eyleyüben seni etdiler meâb
Kendilerin varlığını çün kim etdiler fenâ
Zâhir oldu dost cemâli zîrâ ref' oldu nikâb
'Âlem içre mest oluban her neye kim bakdılar
Gördüler kim kendine Hakk kendi idermiş hitâb
Külli şey'i gördüler kim cümle meclâ-yı sıfat
Pes sıfatda gördüler mevsûfu hem çün âfitâb
Şâha mir'ât oldular hem mâsivânın hayderi
Pes bulardan oldu 'âlem içre cümle feth-i bâb
Ma'rifet gülzârı içre 'andelîb-i cân olup
Geh cemâli karşısına bin bin okurlar kitâb
Cümle varlığı fenâfillahda ifnâ itdiler
Pes bekâbillahda buldular kemâl ile savâb
Ravza-i 'irfân içinde mest olup 'aşkdan bular
Bu vücûdun şîşesini kesr ederler bî-riyâb
Çün ki bahreyn mecmâ'ıdır hem İlâh'ın mazharı
Pes bulardan gayrı 'âlem hep hayâldir ke's-serâb
Zâhidâ var 'aşk ile hiç ta'ne vurma anlara
Zîrâ derler 'aşk içinde her hatâyı hoş savâb
Bilmezsin sen buların sırlarını 'akl ile
Zîrâ gülzâr kıymetin bülbül bilir bilmez gurâb
Sen hazer et anlara hîç ta'n u inkâr eyleme
Yoksa cîfe olısarsın fî'l-cahîm içre kilâb
Sen mukârin eyle zerrât-ı vücûdun Şems ile
Yoksa kaldın sen muhalled fi'd-duhân ev fî's-sehâb
Akşemseddîn Velî
Kuddise Sırruh