Sakın Aldanma Kardaş u Azîzim Gel Bu Dünyâya
6 Haziran 2019 tarihinde yayınlanmıştır.
NASÎHAT
Sakın aldanma kardaş u 'azîzim gel bu dünyâya
Ki ol mekkâredir zîrâ salar başını kavgâya
Ana dil verüben cem' eyleyen oldu cüdâ Hakk'dan
Kulak tut nutkumu dinle gider dîn yoksa yağmâya
Resûlullah hadîsinde buyurmuş cîfedir dünyâ
Kilâbdır dahi tullâbı verir Hakk anı a'dâya
Ve buyurmuş ki dünyâ hubbudur başı kamu zenbin
Hudâ-yı lem-yezel virmez anı hizb-i ehibbâya
Anı dostlarına dahi verir Mevlâ der isen bil
Gönül vermezler anlar hîç ne dünyâya ne 'ukbâya
Kişi bir dilber-i ra'nâyı sevse cân u gönülden
Yanar 'aşkı ile anın düşer mi gayrı sevdâya
Kifâf mikdârına üç nesnenin râzî vü kâni' ol
Biri mesken biri melbes dahi bir ka'se çorbâya
Buhulden ihtirâz eyle bahîli çün ki Hakk sevmez
Sever cömerdi hem idhâl ider cennât-ı 'ulyâya
Elinde vâr iken fırsat hemân sa'y-i belîğ eyle
Se'âdet bulayım dersen işini koyma ferdâya
Kamudan nefsini alçak tutup eyle tevâzu' sen
Bu râhın ehline çün ki tevâzu' oldu sermâye
Hudâ'nın ni'metini hem suçunu i'tirâf eyle
Güvenme zerre mikdârı kemâl ü zühd ü takvâya
Günâhım çok deyu kesme ümmîdi bahr-ı rahmetden
Ki 'afv olunsa hep gümrâh naks gelmez o deryâya
Bulup bir şeyh-i kâmil gir erenler gitdiği râha
Olur kalbinde hâsıl 'aşk ki oldur vuslata mâye
Şerî'atsız tarîkat işi bitmek mümteni' zîrâ
O bir kapu ki andan erilir maksûd-ı aksâya
Ana kim ki eder ta'zîm odur mü'min velî Hakk'a
Dahi mülhid münâfık şol ki uymaz şer'-i zîbâya
Buyurmuşdur Resûlullah kaçın siz ehl-i ilhâddan
Uyuz gibi sirâyet eyler ol lâbüd esihhâya
Tefekkür eyle âyâtında hem Hallâk-ı ekvânın
Dilinden zikrini kesme erersin câh-ı bâlâya
Hudâ'dan iste gel 'aşk-ı hakîkî geç mecâzîden
Nedâmet eyledi Mecnûn sonunda 'aşk-ı Leylâ'ya
Nasîhat etdi Kuddûsî sana bu on dokuz beytde
Tutarsan vâsıl olursun anı bî-şübhe Mevlâ'ya
Ahmed Kuddûsî
Kuddise Sırruh