Sâlikâ Dinle Beni Diyem Sana Bir Hoşça Râz
25 Ekim 2020 tarihinde yayınlanmıştır.
NASÎHAT
Salikâ dinle beni diyem sana bir hoşça râz
Çün gereklidir be-gâyet eyle gönülden rikâz
Hakk Te'âla Hazretleri buyurdu gizli kenz idim
Halkı yaratdım ki bilsinler beni bî-inhicâz
Bildiler O'nu bilenler oldular üç tâife
Birisinin bildiği çok biri evsat biri az
Biri taklîd ile bildi biri istidlâl ile
Biri tahkîk ile bilüp etdi Hakk'a in'iyâz
Şol mukalliddir ki elden işidüp bildi anı
Müstedil naklen ü 'aklen bilüben oldu türâz
Bildi Allah'ı muhakkak bî-gümân 'ayne'l-yakîn
Cümlesinden anı a'lâ eyledi ol bî-niyâz
Kim ki bu sırra olursa âşinâ Hakk'ı bilir
Hakk'ı bilmek diler isen bunu levh-i dilde yaz
Ma'rifet verildi insâna hemin gayrıda yok
Anınçün oldu insân cümle mahlûkdan firâz
Ma'rifet dedikleri bir feyz-i rabbanî dürür
'İlm-i zâhir ile ancak kişi onu bulamaz
'İlm-i bâtın zâkirin kalbinde tez hâsıl olur
Zühd ü takvâ etmek ile kimse 'ârif olamaz
Okursan bin cild kitâbı eylesen bin yıl 'amel
Ma'rifetden zerre tanmaz kalbine gel etme nâz
Hem bu denli olsa ömrün eylesen hac her sene
Her gece kılsan kamu şart ile bin rek'at namâz
Sâim olsan her gün aslâ yemesen hem içmesen
Cân kulağı ders-i 'irfan noktasını duyamaz
Cümle halk olsa muhibbin etseler i'zâz seni
Anı 'izzet sanma çün Hakk ile olur i'tizâz
Der isen kim nice tahsîl olunur bu ma'rifet
Cân u dilden dinle diyem sana eyle iktinâz
Ma'rifet gönülde doğar cezbe ile gün gibi
Cezbe de zikr ile dolup kalbe eder ihtizâz
Zikrin enva'ı dahi çokdur kamunun efdali
Nefy ile isbât buyurdu sâkin-i arz-ı Hicaz
Bu yola şeyhsiz sülûk etmekde var havf u hatar
Bir icâzet sâhibi şeyhden izin al kıl cihâz
Bulamazsan şeyhi sana benden olsun izn-i tâmm
Eyle imdi zikr-i bî-hadd etme aslâ ihtirâz
Bu icâzet-i 'âmmedir verdim izin isteyene
Tâ kıyâmet gününe dek zâkirine var icâz
Yazana okuyana dinleyene verdim izin
Bu hakîkat emridir zann itmeniz emr-i mecâz
Dedi Peygamber ki taşa hüsn-i zann iden dahi
Nef'ini bulur o taşın menzili olur nişâz
Her kim eyler bu icâzet-nâmeye hoş hüsn-i zann
Anı Allah ehl-i 'irfândan ider mahrûm komaz
Girmek istersen erenler zümresine ey 'azîz
Durma dâim eyle tevhîd gece gündüz kış ü yaz
Dört neferden 'uzlet eylersen bulursun tîz murâd
Ehl-i dünyâ ehl-i gaflet ehl-i bid'at hîlebâz
Kesme dilden her nefes her dem beher hâl zikri sen
Zâkirin kalbine şeytân mâsivâyı komaz
Bulamadım bir şeyh deyüp terk itme zikrullahı çün
Sana Kuddûsî icâzet virdi oldun sen mücâz
Ahmed Kuddûsî
Kuddise Sırruh