Sâlikâ Gel Nefs ü Şeytân İle Edelim Savaş
26 Haziran 2020 tarihinde yayınlanmıştır.
NASÎHAT
Sâlikâ gel nefs ü şeytân ile edelim savaş
Olalım her dem mücâhid yatmayalım der-firâş
Etmeyeler tâ ki îmân hısnına hîle hırâş
Dü cihânda etme yâ Rab bizleri rüsvây-fâş
Ol habîbin hürmeti'yçün eyle îmânı yoldaş
Gaflet ile koyma âgâh eyle bizi yâ ilâh
Ol habîbin ile rehber hem dahi püşt ü penâh
'Afv u ihsân-ı mürüvvet lutf ile eyle nigâh
Dü cihânda etme yâ Rab bizleri rüsvây-fâş
Ol habîbin hürmeti'yçün eyle îmânı yoldaş
Az yiyelim az içelim edelim kasr-ı menâm
Zikr ü fikr ile olalım dâimî subh ile şâm
Rûz-ı ferdâ olmayalım çün rezîl beyne'l-enâm
Dü cihânda etme yâ Rab bizleri rüsvây-fâş
Ol habîbin hürmeti'yçün eyle îmânı yoldaş
Sözümüz halk ile olsun özümüz Mevlâ ile
Kizb ü gıybet zemm ü buhtân almayalım bu dile
Kendi 'aybımız görelim bakmayak ayb-ı ele
Dü cihânda etme yâ Rab bizleri rüsvây-fâş
Ol habîbin hürmeti'yçün eyle îmânı yoldaş
Sûziyâ tefvîz eyle her umûrun Hakk'a sen
Benliği terk eyleyüp deme sözünde sen ü ben
Her ne olsa anla Hakk'dan halka etme sû-i zan
Dü cihânda etme yâ Rab bizleri rüsvây-fâş
Ol habibin hürmeti'yçün eyle îmânı yoldaş
Ahmed Sûzî
Kuddise Sırruh