Sana Bir Ma'cûn-ı Nâfi' Öğreteyim Sâlikâ

17 Eylül 2019 tarihinde yayınlanmıştır.

NUTK-İ ŞERÎF

Sana bir ma'cûn-ı nâfi' öğreteyim sâlikâ

Anı her kim yer ise görmeyiser renc ü 'anâ

Gerçi her derde devâ vermiş Hudâ lâkin beğim

Yok durur anın gibi dünyâda kuvvetli devâ

Bir kişi 'ömründe bir kerre yese bulur necât

Sâlim olur her belâdan hîç 'azâb olmaz ana

Gece gündüz durmayup her dem diyen 'âşıklara

Bil hayât-ı sermediyye bahş eder Bârî Hudâ

Hem eder rûhu telezzüz anı iksâr edenin

Gönlüne deryâ gibi 'aşk doluben bulur safâ

Ol olur Hakk'ın enîsi Hakk olur ana celîs

'Akıbet eyler o ma'cûn anı Hakk'a âşinâ

Bil ki ma'cûn dediğim tevhîd-i Yezdân'dır benim

Semm ile tiryâkdan olmuşdur mürekkeb dinle hâ

Semm-i nefy' isbât dahi hem sâlike tiryâkdır

Sâlike ma'cûn-ı müshildir verir kalbe cilâ

Anı bir kez dese kâfir mü'min olur şübhesiz

Rûz u şeb meşgûl olan ana velî olmaz mı yâ

Anı iksâr eyle Kuddûsî gece gündüz hemân

Olmasun 'ömr-i 'azîzin hâb-ı gafletle hebâ

Ahmed Kuddûsî

Kuddise Sırruh