Sana Ey Tâc-ı Serim Şâh-ı Şerî‘at mı Diyem
15 Mart 2018 tarihinde yayınlanmıştır.
NA'T-I ŞERÎF
1
Sana ey tâc-ı serim şâh-ı şerî‘at mı diyem
Efser-i dîn mi vü yâ cukka-i millet mi diyem
Kamer-i leyle-i isrâ mı hidâyet mi diyem
Sâyir-i ‘arş-ı berîn tâyir-i kudret mi diyem
Gül-i gülzâr-ı safâ bülbül-i ülfet mi diyem
Der-i deryâ-yı vefâ kân-ı sehâvet mi diyem
Kulzüm-i lutf mu yâ kûh-ı kerâmet mi diyem
Ni‘met-i mahz mı yâ ‘âleme rahmet mi diyem
Bilmezem ‘aynına âfet sana sûret mi diyem
Şaşmışam vasfda ayâ buna hayret mi diyem
Sana Ahmed mi Muhammed mi mehabbet mi diyem
Yoksa mahbûb-ı Hudâ şâh-ı melâhat mı diyem
2
Gark-ı deryâ-yı günâhem eğer ey tekyegehim
Gam değil lutfumla kim bana neyler günehim
Bulmuşam çâre-i mihrinle ki ey rûy-ı mehim
Feyz-i çeşminden alır dârû derûn-ı tebehim
Kaşların şâm u ruhin vakt-i seher secdegehim
Şâm nâlemle yanar âhımıla subh-gehim
Pây-mâl eyle bu ser-geşteni kim hâk-ı rehim
Dolanam başına göster yüzün ey serv-i sehîm
Olmasın dîde-i ter gayra olursa nigehim
Kalmışam mahz-ı tereddüdde ki ey pâdişehim
Sana Ahmed mi Muhammed mi mehabbet mi diyem
Yoksa mahbûb-ı Hudâ şâh-ı melâhat mı diyem
3
İştiyâkım geceler ‘âşıkı bîdâr eyler
Mest çeşmin hevesi mâil-i dîdâr eyler
Kâkülün tâlib-i sevdânı hevâdâr eyler
Dili şehdâb-ı lebin zevki şeker-hâr eyler
İltifâtın nazar ehlini haber-dâr eyler
Mey-i sermest gözün gâfili hüşyâr eyler
Gamzen erbâb-ı dili sâhib-i esrâr eyler
Tûtî-i tab‘ı lebin şevki şeker-hâr eyler
İdemem vasf seni ‘aşk-ı şirînkâr eyler
Tab‘-ı ter ey gül-i ter şevk ile tekrâr eyler
Sana Ahmed mi Muhammed mi mehabbet mi diyem
Yoksa mahbûb-ı Hudâ şâh-ı melâhat mı diyem
4
Tab‘-ı Hassân'ıma her şâ‘iri yeksân demezem
Sıfatın söylerem er korkarım âsân demezem
Sana Kur'an demese ben sana insân demezem
‘Ârızın mushaf-ı Mevlâ nice Kur'ân demezem
Sana cân vermeyene sâhib-i îmân demezem
Cân nedir kim anı ey büt sana kurbân demezem
Cân fedâ olmasa kurbânın olam cân demezem
Gayrı peykân-ı gamın derdime dermân demezem
Seyf-i Mevlâ kaşına yây-ı Nerîmân demezem
Âşikâre diyerem bu sözü pinhân demezem
Sana Ahmed mi Muhammed mi mehabbet mi diyem
Yoksa mahbûb-ı Hudâ şâh-ı melâhat mı diyem
5
Ne gam Ahmed-i muhtâr ki gam-hârımdır
Râh-ı sevdâda Muhammed ki mededkârımdır
Dem-be-dem şîr-i mehabbet ki hevâdârımdır
‘Aşk-ı mahbûb-ı Hudâ kim heme dem yârimdir
Hıdmet-i şâh-ı melâhat ki güzel kârımdır
Medhin ey dilber-i zîbâ şirîn ezkârımdır
Deheninden ne diyem cân gibi esrârımdır
Vasf-ı şehdâb-ı lebin bâ‘is-i eş‘ârımdır
La'line vermeğe cân şevk ile efkârımdır
Şeş-der-i hayret-i sevdâda bu güftârımdır
Sana Ahmed mi Muhammed mi mehabbet mi diyem
Yoksa mahbûb-ı Hudâ şâh-ı melâhat mı diyem
6
‘Ârızın Mîr Nigârî ki temâşâ eyler
İltifât eylemez ağyâra tehâşâ eyler
Gül-i gülzâra nazar eylemez hâşâ eyler
Gülşen-i ‘aşkını ey gonce ki me’vâ eyler
Mest ü lâ yu‘kal özün bülbül-i şeydâ eyler
Meyl-i serv eylemez ol kâmet-i bâlâ eyler
Reh-güzârında özün bî-ser ü bî-pâ eyler
Hâk-i râh-ı kademin ol ki musallâ eyler
Şîşe-i çeşmimi ol kühl-i mücellâ eyler
Senden ey mâh seher ü şâm temennâ eyler
Sana Ahmed mi Muhammed mi mehabbet mi diyem
Y oksa mahbûb-ı Hudâ şâh-ı melâhat mı diyem
Seyyid Hamza Nigârî
Kuddise Sırruh