Sana Gûyendelik Edem Olursan Ger Bana Dem-sâz
22 Ocak 2021 tarihinde yayınlanmıştır.
NUTK-İ ŞERÎF
Sana gûyendelik edem olursan ger bana dem-sâz
Çalam kânûn-ı hikmetden duyasın nice gizli râz
Bu 'âlem ger müşevveşdir velî kânûna hoş benzer
Çalar dest-i kazâ anı verir bir kılı bir âvâz
Mezâhirden nikâb vurmuş anınçün mahfîdir zâtı
Velî sun'u zuhûr eder kamu eşyâda bî-enbâz
Gözün aç gezme bîhûde bu işlerden haberdâr ol
Kulağın vâr ise dinle ne hâcet ben olam gammâz
Makâmında olup her şey sıfâtın perde tutunmuş
Lisân-ı hâl ile şânın eder ol perdeden ibrâz
Kaçan kim perdeden düşüp makâmın taşra bıraksa
Anı te'dîb edüp fi'l-hâl ediser gûş-mâl ol bâz
Tefekkür kılsan eczâ-yı cihân 'ulvî vü ger süflî
Egerçi zahme bir lâkin gelir her zerreden bir sâz
Kimin nâlân eder halkın kimine hande bağışlar
Niyâz eder kimin işin kimini eyler ehl-i nâz
Kime sıhhat verir dâim belâdan hîç haber vermez
Kimisin mübtelâ edüp eder derd ü gama hem-râz
Fakîr eder kimin halkın verir kimisine dünyâ
Kanâ'at bahş olur kime verir kimine hırs u âz
Kimine feth olur esmâ dilinde vird olur yâ hû
Hüviyyetden duyup remzi hevâlardan gelir âvâz
Kimin bende edüp halkın bırakır nice yüzünde
Kimin şâh-ı cihân eyler olur bu bendelerden bâz
Kimin nâdân edüp halkın semâ vü arz fark etmez
Kimine ma'rifet verüp eder 'arş üstüne pervâz
Kimin dünyâya kul eyler "e'âzallâhu iyyânâ"
Binüp hırs atına dâim yeler usanmaz ol kurnâz
Eder her dem bu eczâ-yı cihânda türlü iş peydâ
Velî kend,si gizlidir arada hem çü lu'bet var
Çü zerrât-ı cihân Şemsî bu esrârı eder ifşâ
Ne lâzım sana keşf etmek eger ıtnâb eger îcâz
Şemseddîn Sıvâsî
Kuddise Sırruh