Sana Senden Yakındır Hakk Sakın Olma Dilâ Gâfil
7 Temmuz 2021 tarihinde yayınlanmıştır.
NUTK-İ ŞERÎF
Sana senden yakındır Hakk sakın olma dilâ gâfil
Hemân senlik-dürür ancak bu ortada olan hâil
Gözün aç ma'nâyı anla bu zevkle olur hâsıl
Muhît-i bahr-i tevhîdi bilüp 'ummân-ı bî-sâhil
Vücûdun katresin mahv et eğer oldunsa ehl-i dil
Huşûnet etmesin nefsin riyâzat çekdirüp nerm et
Gider koma keder dilde musaffâ kıl safâ-bezm et
Şarâb-ı 'aşkı nûş edüp anla cânını germ et
Mecâza bakma ey sâlik hakîki matlaba 'azm et
Ki zîrâ zıll-i zâilde ikâmet eylemez 'âkil
'Abes ümniyeler edüp mülevves levne boyanma
Uyup gûl-i beyâbâna nedâmet oduna yanma
Enâniyyet ile kimse Hakk'a vâsıl olur sanma
Şeb-i firkatdeki kesret hayâl-i zılldir aldanma
Serâbı ko serâya bak serây-ı sırra ol vâsıl
Su üzre nakş olan cismin hayâline sen aldanma
Binâsı bâd ile olan vücûd kasrına aldanma
Hemân sen sâni'in gör kim anın zeynine aldanma
Temevvüc eyleyen deryâya bak emvâca aldanma
Güneş tâbında çün şebnem bilirsin kim olur zâil
Nice bir 'Abdiyâ gussa-i gam dildâr ile firkat
Seyâhat kıl sülûkla vücûdundan edüp 'uzlet
Gidince ikilik senden hemân yüz gösterir vahdet
Hüdâyî vahdete bak kim ana mâni' değil kesret
Ola mı âfitâba hiç vücûdu zerrenin hâil
Hazret-i Hüdâyî'nin "Muhît-i bahr-i tevhîdi bilüp 'ummân-ı bî-sâhil" diye başlayan nutk-i şerîfi üzerine, Sarı Abdullah Efendi'nin tahmîsidir.