Sanma Bu Köhne Sarâyı Ey Gönül Dâr-ı Karâr
13 Ağustos 2021 tarihinde yayınlanmıştır.
NUTK-İ ŞERÎF
Sanma bu köhne sarâyı ey gönül dâr-ı karâr
Gece gündüz sa'y edüben bulagör bir bâkî yâr
"Küllü şey'in hâlikün" sırrını cânâ zevk edüp
Ol vecihden kıldı 'ârif cânı cânâna nisâr
Nakd-i câna gevher-i bâkîyi eyle iştirâ
'Aşk-ı ma'şûku edegör cân-ı dilden ihtiyâr
Verd-i bî-hemtâ içündür 'andelîbin nâlesi
Gece gündüz ol gül-i bî-hâra zâr eyler hezâr
Cür'a-i 'aşk-ı ezelden her ki nûş eyler bugün
Nefsini kıldı melâmet terk edüp nâmûs u 'âr
Sâlik ol bu neş'e-i dünyâda "mûtû" râhına
Lâhık olur her kişiye yoksa mevt-i ıztırâr
Berr-i firkat içre 'atşân olmayalım yâ Kerîm
Ergörüp anı visâle etme sergerdân-ı zâr
Cism ü câna kıl müyesser feyz-i akdesden nasîb
Ver habîbin hürmetine zât-ı pâke iktidâr
"Küntü kenz"in bâbını feth et Fenâyî bendene
Pertevi mihr-i ezelden eyle anı neş'edâr
Ehl-i Cennet Fenâyî Mehmed Efendi
Kuddise Sırruh