Sanma Ey Hâce ki Senden Zer ü Sîm İsterler

4 Nisan 2020 tarihinde yayınlanmıştır.

NASÎHAT

Sanma ey hâce ki senden zer ü sîm isterler

"Yevme lâ yenfa'u"da kalb-i selîm isterler

Berzâh-ı havf ü recâdan geçegör nâ-kâm ol

Dem-i âhirde ne ümmîd ü ne bîm isterler

Unudup bildiğini 'ârif isen nâdân ol

Bezm-i vahdetde ne 'ilm ü ne 'alîm isterler 

'Âlem-i bî-meh ü hurşîd ü felekde hergîz

Ne mühendis ne müneccim ne hakîm isterler 

'Âlem-i keşf-i me'ânîde çok esrâr açılır

 Varamaz nefs-i gadûb anda halîm isterler

Harem-i ma'nâya bîgâneye yol vermezler

Âşinâ-yı ezelî yâr-i kadîm isterler

Sâkin-i dergeh-i teslîm-i rızâ ol dâim

Ber-murâd etmeğe hizmetde mukîm isterler 

Dergeh-i fakre varup dirliğini arz etme

Anda hergîz ne sipâhî ne za'îm isterler 

Cürmüne mu'terif ol tâ'ata mağrûr olma

Ki şifâhâne-i hikmetde sakîm isterler 

'Âşık ol şerbet-i vasl ister isen kim 'uşşâk

Çâresiz derd arayup renc-i elîm isterler 

Ni'met-i zâhire dilbeste olan gürsineler

Müzd-i nâm-pâreye cennât-ı na'îm isterler

Kıble-i ma'nâya fehm eylemeyen keçrevler

Sehv ile secde edüp ecr-i ‘azîm isterler

Ezber et kıssa-i esrâr-ı dili ey Rûhî

Hâzır ol bezm-i ilâhîde nedîm isterler

Bağdadlı Rûhî

Rahmetullahi Aleyh