Sanma Tehî Ey Gâfil Kârhâne-i Âlemdir

14 Eylül 2018 tarihinde yayınlanmıştır.

NUTK-İ ŞERÎF

Sanma tehî ey gâfil kârhâne-i 'âlemdir

Hiç kimseyi hor görme zirâ benî âdemdir

Âyât ile sâbitdir âdemde kerâmet var

Sanma ki rivâyetdir mektûb-i mükerremdir

Meşhûr meseldir bu bir kimseyi hor görme

Bir pend-i mu'azzamdır her âdeme elzemdir

Dost bendelerin 'aybın her vechile setr eyler

Hakk kullarının dâim esrârına mahremdir

Kim 'âlem-i ma'nâda bulduysa ezel keyfin

Ol zâhir ü bâtında şâhenşeh-i a'zamdır

Kim câm-ı elestîden içmişse mey-i bâkî

Ol 'ahdine sâbitdir ikrârına muhkemdir

Her kim ki eder ta'yîb rindân-ı harâbâtı

Bilmez ki anın âhı şemşîr-i muhteşemdir

Bu sırra eren âdem beyhûde kelâm etmez

Takdîr-i ezeldendir bir hâlet-i mübhemdir

Hicrân oduna yanmış yâ Rab bu hazîn gönlüm

Çün girye-i hasretle kim dîdesi pür nemdir

Er kûy-i harâbâta iç bâde-i gülgûnu

Dök eşki Nigâhî kim bu mâh-ı Muharrem'dir

Maksad bu imiş ey dil ol mâh-ı Muharrem'de

'Âşık olan abdâle her dem dem-i mâtemdir

Diyarbakırlı Nigâhî Hazretleri

Kuddise Sırruh