Sayda Çıkmış Nice Yüz Bin Av Şikâr Eyler Ölüm

16 Ocak 2020 tarihinde yayınlanmıştır.

NUTK-İ ŞERÎF

Sayda çıkmış nice yüz bin av şikâr eyler ölüm

Hâzır ol kardaş sana da intizâr eyler ölüm

Sen idersin gerçi dünyâ bahsini tatvîl bugün

Bu mutavvel bahsi yarın ihtisâr eyler ölüm

Türlü hayvan lahmini yiyüp gıdâlandın bugün

Lahmini yarın gıdâ-yı mûr u mâr eyler ölüm

Şimdi kâr etmez sana pend yüz kitâb okusalar

Bir gün olur ki seni hoş sâzkâr eyler ölüm

Kimseye göstermeyüp cânın gibi sakladığın

Mâlını meydâna döküp âşikâr eyler ölüm

Bunca zînet bunca haşmet bu hadem bu mülk ü mâl

Biri kalmaz cümlesini târümâr eyler ölüm

Olma mağrûr gel şu dünyâ câh u 'izz ü nâzına

Meskenini 'âkıbet sahn-ı mezâr eyler ölüm

Şevk ile bağrına basup kuçup öpüp sevdiğin

Ehlini ardına koyup yâda yâr eyler ölüm

Sevmediğin kişileri mâlına vâris edüp

Aç ü çıplak müflis iken bahtiyâr eyler ölüm

Yüce köşkler gerçi yapdın bî-nazîr ammâ seni

Çok da gitmez çıkarup ağyâra dâr eyler ölüm

Rûh çıkıcak hep kaçar atan anan oğlun kızın

Bu güzel cismini çün mekrûh kokar eyler ölüm

Müsta'id ol mevte Kuddûsî gelür bir gün sana

Çünki her nefse gelüben rehgüzâr eyler ölüm

Ahmed Kuddûsî

Kuddise Sırruh