Sebîl-i Marifetde Bir Mukaddes Rehnümâdır Bu
5 Kasım 2022 tarihinde yayınlanmıştır.
NA'T-I ŞERÎF
Sebîl-i ma'rifetde bir mukaddes rehnümâdır bu
Hulâsâ masdar-ı îcâd olan bir pîşvâdır bu
Bunun devrü'l-füyûżâtındadır bi'l-cümle kudsiyyet
Cihânlar kendine meftûn olan bir Mustafâ'dır bu
Mu'allâdır müzekkâdır musaffàdır mücellâdır
Bütün 'ulviyyeti cem' eyleyen bir müctebâdır bu
Şerî'at feyz-i akvâli tarîkat yümn-i ef'âli
Hakîkatdır bütün hâli 'aceb bir muktedâdır bu
Nebîlerle velîler necm-i 'irfân u kemâlâtı
Semâ-yı feyz-i tenvîr eyleyen şemsü'l-hüdâdır bu
Kemâlât-ı dü kevni cem' edip zât-ı celîlinde
Safâsından safâ-bahş-ı kulûb-ı evliyâdır bu
Tecellî lüccesinde garķa-i envâr-ı Mevlâ'dır
Bütün envârı nâşir mazhar-ı nûr-ı Hudâ'dır bu
Semâvât-ı 'ulâ bir hatvedir râh-ı füyûzunda
Nübüvvetle şeref-bahşâ-yı 'arz-ı i'tilâdır bu
'Urûc etdikçe etmiş vâ-pesîn-i pâye-i 'akla
Hıred-sûz-ı e'âzımdır muķaddes bir zıyâdır bu
Der-i feyz-i kemâlâtındadır rûhu'l-emîn der-bân
Kemâlinden kemâl-ârâ-yı kurbu’l-intihâdır bu
Bu sırr-ı nûr-ı Mevlâ'dır bu nûr-ı sırr-ı a'lâdır
Serâir sırr-ı zâtından doğan nûru'l-'ulâdır bu
Yemîninde güler gülzâr-ı feyz-â-feyzi lâhûtun
Yesârında duran nâsûta zîb-i incilâdır bu
Edebdir farz-ı akdesdir Cenâb-ı Ahmed'e ta'zîm
Mukaddesdir habîb-i hâss-ı Zât-ı Kibriyâ'dır bu
Olur ser-bürde-i tebcîl o zâta cümle ehlulllah
Serîr-i ıstıfâda pâdişah-ı asfiyâdır bu
Muhabbet cismimin her cüz'-i ferdinden nümâyândır
Dil-i sûzânıma sermâye-i zevk u safâdır bu
Dedikçe Yâ Muhammed nûra müstaġraķ olur kalbim
Muhabbetden hüveydâ 'âşıkâne bir nidâdır bu
Füyûz-ı Ahmediyyet mevce mevce şu'le salmışdır
Zıyâ-hâhânına kandîl-i lâhûtî zıyâdır bu
Dahîlek yâ Muhammed şu'le-dâr-ı feyz-i hâssın kıl
Bu Mecdî 'abd-i 'âcizdir kemîne bir gedâdır bu
Abdülazîz Mecdî Tolun
Kuddise Sırruh