Sehâvetden Açıldı Çün Bâbın Bu Olusar Senin Ni'me'l-Meâbın

8 Haziran 2019 tarihinde yayınlanmıştır.

NUTK-İ ŞERÎF

Sehâvetden açıldı çün bâbın

Bu olusar senin ni'me'l-meâbın

Sehâvet ola çün kim bir kula fâl

Meâli cennet olup hûb ola hâl

Ki cennet dârü'l-eshiyâdır

Anınçün mü'minin kârı 'atâdır

Dilersen bulasın erzâk u erfâk

Sehâ dersinden oku birkaç evrâk

Kerâmet şehrine bunsuz varılmaz

Nübüvvet Ka`be'sine hîç erilmez

Şi'ârı budur ashâb-ı yemînin

Bununladır kıyâmı hem zemînin

Açık oldukça işbu bâb-ı meymûn

Geliser Hakk'dan eltâf-ı hümâyûn

Bu bâbından gelir a'vân-ı Rahmân

Hezîmet bulur ol dem cünd-i şeytân

Kaparlar ol zamân buhlün kapısın

Yıkarlar dahi şeytânın yapısın

Ki fakr ile etmişdi senin tahvîf

Bu yüzden okumuşdu çok erâcîf

Sehâ ile çün erersin reşâda

Düşer bu sözleri anda kesâda

Olursun pes sehâ sırrından âgâh

Okur eşyâ sana hep "akradullah"

Dimâğın şemm ede çün tayyibâtı

Henüz gûş edesin "âtü'z-zekât"ı

Çü kalbinden kopa şefkatle irfâk

Neler diye sana âyât-ı infâk

Şemseddîn Sıvâsî

Kuddise Sırruh